Охирги янгиликлар

Оналари иззат топган, қизлари қадрланган юрт Долзарб

Қушлар чуғури, аҳён-аҳёнда булбуллар хониши қулоққа чалиниб, баҳорнинг ўзига хос, дам майин, дам аччиққина шабадаси ела бошлаган бир пайтда баҳор кириб келганини ҳис қиламиз. Шу онларда юртимизда Халқаро хотин-қизлар байрамига тайёргарлик кўрила бошлайди. 
Вилоятимизда жорий йилда байрам азалий қадриятларимизга уйғунлашган ҳолда бошланди. Маҳаллаларда ёши улуғ онахонлар ҳолидан хабар олинди, меҳрга муҳтож опа-сингиллар байрам билан қутланди. Таълим муассасаларида ўқувчилар томонидан "Онам дерман", "Устозим – онам" мавзуларида иншолар битилди, уч авлод учрашувлари ташкил этилди. Маҳаллаларда хотин-қизлар учун Самарқанддаги қадамжоларга саёҳатлар уюштирилмоқда. 

Вилоятнинг асосий тантаналарида турли соҳаларда меҳнат қилаётган, давлат мукофотларига сазовор бўлган аёллар, жамоат ишларида фаол қизлар, нуроний ва кўпни кўрган онахонлар иштирок этди.
Иштирокчилар даставвал вилоят мусиқали драма театрида Ўзбекистон халқ артисти, Ўзбек миллий академик театри актёри Ёдгор Саъдиев томонидан саҳналаштирилган "Иймон" спектаклини томоша қилдилар. Эл ардоғидаги санъаткорлар Э.Комилов, Ф.Маъсудов, Ё.Саъдиев ва бошқалар вилоят хотин-қизларини байрам билан муборакбод этди. 
Бир пиёла чой устида кечган тантанали анжуманда вилоят ҳокими Ҳ.Оқбўтаев сўзга чиқиб, жамиятда хотин-қизларнинг тутган ўрни, бугунги кунда улар эришаётган ютуқларнинг аҳамияти, оила хотиржамлиги йўлида аёл, фарзандлар камолида онанинг роли нечоғлик аҳамиятли эканига тўхталиб ўтди.

Таъкидландики, бугун вилоятимизда 1 миллион 800 мингга яқин хотин-қизлар истиқомат қилади. Халқ депутатлари вилоят, шаҳар ва туман кенгашларида 150 нафарга яқин аёллар фаол иш олиб бормоқдалар. Таълим ва тиббиёт соҳаларида ишловчиларнинг 78 фоиздан ортиғини хотин-қизлар ташкил қилмоқда. Улар орасида 12 нафар фан доктори, 200 нафарга яқин фан номзодлари меҳнат қилмоқда.
– Мамлакатимизда хотин-қизларга алоҳида ғамхўрлик кўрсатилиб, уларнинг оғирини енгил қилиш, фаровон яшашлари учун шароит яратишга катта эътибор қаратилмоқда, – дейди Иштихон туманидаги "Эргашхон паррандалари" кўптармоқли фермер хўжалиги раҳбари Сайёра Музаффарова. – Чунки хотин-қизлар қадр топган юртнинг бугуни ва эртаси фаровон бўлади. Бугун аёллар тадбиркор, ҳар ишда етакчи. Биз ҳам йигирма йил олдин пахта ва ғалла етиштириб иш бошлаган бўлсак, ҳозирда коллеж битирувчиларини жалб қилиб, фермер хўжалигимизда қуёнчилик фермасини очдик. Яқин орада банк кредити эвазига асаларичиликни йўлга қўймоқчимиз. Кейинчалик бу тармоқлар алоҳида ажралиб чиқиб, тадбиркорга айланган коллеж битирувчиларининг ўзлариники бўлади.
Тадбирда бир гуруҳ фаол хотин-қизларга вилоят ҳокимлигининг фахрий ёрлиқ ва эсдалик совғалари топширилди. Аёл, онани мадҳ этувчи куй-қўшиқлар кечага файз киритди.
Ўз мухбиримиз.


Исм:*
E-Mail:
Изох:
Кодни киритинг: *
Кликните на изображение чтобы обновить код, если он неразборчив