Андроид қурилмалар учун Zarnews.uz мобил иловаси. Юклаб олиш x

Кечиришни ўрганишингиз керак...

Сени кечирдим... Кечиришга лойиқ бўлганинг учун эмас, менинг қалбим тинчликка мойиллиги учун.

Агар биров бизга ноҳақ муносабатда бўлиб, қаттиқ хафа қилса, хўрласа, дилимиз оғрийди. Бундай пайтда инсонни ғазаб, нафрат каби ҳар хил туйғулар, баъзида эса қасос олиш истаги қамраб олади. Бу каби ҳис-туйғулар сизнинг қасоскор эканлигингизни эмас, балки инсонга адолатлилик туйғулари бегона эмаслигининг далолати.

Хафагарчилик бизга фақат ички азобни келтириб, бундан ҳам кўп зарар етказади. Буни тўхтатишнинг ягона йўли ёвузлик келтириб чиқарган кишига яхши муносабатда бўлишни онгли равишда ҳис қилиб, уни кечиришдир. Бу ниҳоятда қийин қарор ва бир кунда содир бўлмайдиган жараён. Бундан ташқари, сиз нафақат дилозорни кечиришингиз, балки унга сизни ранжитишга йўл берганингиз ва уни тўхтатмаганингиз учун ўзингизни ҳам кечиришингиз шарт.

Бошқаларни ва ўзингизни кечира олиш онгингизнинг кучли ва мослашувчан эканлигидан далолат беради. Бу кимдир орзуларингизнинг барбод бўлишига ва руҳингизни парчалаб ташласа ҳам сиз синмайсиз, аксинча, шифо топиб, ўз йўлингизда ҳаракатланишда давом этасиз дегани.

Ўзингиз билан уйғунликда яшашингиз учун сиз гўёки оёқларингизга уриб, сизни қулатадиган денгиз тўлқинларини қувонч билан қабул қилганингиздек, қўрқув ва оғриқнинг кўзига тетик қарашингиз лозим. Биз хиёнатдан, хиёнаткордан қўрқамиз. Модомики шу ҳолат рўй берса, бошингизни баланд кўтариб, елкангизни тўғрилаш учун ўзингизда куч топинг. Сизнинг вазифангиз – фақат олдинга интилиб яшаш.

Гап шундаки, хиёнат яралари ўзидан ўзи битмайди. Оғриқ чидаб бўлмайдиган даражада бўлиб, том маънода қалбингизни тирнаса ҳам кечиришни ўрганишингиз керак.

Шубҳасиз, бу иш осон эмас. Худбинлигингиз қаршилик кўрсатади. Аммо бу оғриқдан халос бўлиш ва бахтга эришишнинг ягона йўли. Кечиримли бўлиш биринчи навбатда, шахсий ўсишингиз, ҳиссий ақлни ривожлантириш, онгни янада мослашувчан қилиш учун зарур. Бу фазилат сизни фақат оқилликка чорлайди, сизнинг ақлий фаровонлигингиз чиниқиши учун хизмат қилади.

Кечириш кучи ҳаётингиздаги барча тўсиқларни енгиб ўтишга ёрдам беради. У сизни даволайди, кучайтиради ва дунёга бошқа кўз билан қарашга ундайди. Бундан ташқари, кечириш сизни ҳақиқий севги ва ишончни янада кўпроқ қадрлашга ўргатади.

Бошқаларни кечиринг, асосийси, уларга заиф томонларингиздан фойдаланиб, сизга зиён етказишга йўл қўйганингиз учун ўзингизни ҳам кечиринг.

Баҳора МУҲАММАДИЕВА.