Муаллимлар

Мамлакату миллатнинг

                 зиёси муаллимлар

Илму дониш маърифат-

                  дунёси муаллимлар.

Олам бани башарнинг

                 қароргоҳ маконидир,

Барқ урган чаманзорлар

                 дарёси муаллимлар.

Яшамоқ завқу шавқин

                 ҳамда ҳаёт мадҳининг

Сабоғин қалбга солган

                 даҳоси муаллимлар.

Шогирдлар –орзу отли

                 қадалган ниҳоллардир,

Уларнинг шавқи-меҳри

                гиёси муаллимлар.

Турмушда касби кор кўп

                тириклик таянчлари

Беҳисоб ҳунарларнинг

               аълоси муаллимлар.

Сиз ранж ила ўқитган

               битта ҳарфнинг қийматин

Юзта ганж ила бўлмас

               адоси муаллимлар.

Кеча тарих, бугун нақд,

              эрта нася демайди

Барча замонларнинг жон

             фидоси муаллимлар.

Ҳаёт кураш меҳнатдир

             дўсту душман ёнма-ён

Зафар қучган ғолиб

            раҳнамоси муаллимлар.

Меҳру шафқат, саховат

            дарсларининг мавзуси

Вале, душманга нафрат

            расоси муаллимлар.

Тарихларда тоабад

           ном қолдирган буюклар

Куч қудратига боис

           фатвоси муаллимлар.

Устозу пири бузург

           ҳам мураббий шаклида

Ардоқланиб айтилар

           сиймоси муаллимлар.

Оламда муаллимдан

            сабоқ олмаган бўлмас

Боқий эрур ташаккур

            садоси муаллимлар.

Ҳарна дил розларини

           изҳор айлади шогирд

Табрик-Нурийнинг шеърий

            навоси муаллимлар.

Нуриддин Бобоқандов