Андроид қурилмалар учун Zarnews.uz мобил иловаси. Юклаб олиш x

Трикотаж фабрикасининг сабзавот “конвейери”

Ўнлаб тўқув дастгоҳлари ва тикув машиналари тинимсиз ишлаб дунё бозорида харидоргир трикотаж кийимлари ишлаб чиқарилаётган саноат корхонасининг ёнгинасида чинакам деҳқон хўжалигига хос манзара, уддабуронлик, ишчанлик ва саранжом-саришталик, очиғи бизни ҳайратга солди. Фабриканинг ёрдамчи хўжалиги деб аталаётган салкам 1 гектарлик иссиқхонада помидор, бодринг етиштириляптики, ҳосили кўзни қувонтиради. Ундан сал нарироқда қорамол, қўй боқилаётган чорвачилик фермаси... Ҳатто мослаштирилган сунъий сув ҳавзасида балиқ етиштирилмоқда. Етти хазинанинг бири деб қаралаётган паррандачиликни ривожлантириш мақсадида 1000 бош зотдор товуқ ҳам парваришланяпти.

- Эҳтиёткорлигимиздан ажабланманг, биз бу ёрдамчи хўжаликни анча илгари кўп машаққат чекиб бўлса-да жой-жойига қўйиб чиққан эдик, - дейди корхона бош директори Комила Раҳимова. – Бугун пандемия одамлар саломатлигига, бутун дунё иқтисодиётига, хусусан, озиқ-овқат захираларининг хавфсизлигига хавф солиб турган бир шароитда саноат корхонасининг ичида ёрдамчи хўжалик тузганимиз ҳар жиҳатдан ўзини оқлаяпти. Ишчи-хизматчиларимизга бажарган асосий ишлари учун дурустгина маошни ўз вақтида кечиктирмай тўлаб боряпмиз. Аммо шу маош қаторида тикувчи ёки тўқувчи қизларимизга уйга олиб боришлари учун эҳтиёжга қараб гўшт, тухум ёки сабзавот тарқатилмоқда. Бундай ғамхўрликдан кейин оддий ишчининг корхона тараққиётига, истиқболига дахлдорлиги, унинг ташаббускорлиги, изланувчанлиги янада ортади.

Бу Жомбой туманидаги “Амин инвест интернейшнл” қўшма корхонасида гувоҳи бўлганимиз, эшитганимиз ва кўрганларимиз асосидаги ибратли воқеа. Пандемия, карантин пайтида барча санитария ва хавфсизлик талабларига қатъий амал қилган ҳолда ишлаб чиқаришини тўхтатгани йўқ. Салкам 500 кишини иш билан таъминлаб, ички ва ташқи бозорга бежирим трикотаж маҳсулотлари етказиб бераётган фабрикада бугун ҳам ҳар бир ишчи, мутахассис ўз вазифасини сидқидил бажаришга, сифат масаласида буюртмачиларга эътироз қолдирмасликка ҳаракат қилади. Шу боис, фабрикада тайёрланаётган 30 хилдаги маҳсулотларнинг асосий қисми, яъни 80 фоизи экспортга йўналтириляпти.

Фабрика Россия, Украина, Қозоғистон сингари давлатларга йилига 2,5-3 миллион АҚШ доллари миқдорида трикотаж маҳсулотлари етказиб келаётган эди. Энди хорижий буюртмачилар рўйхатида яна 4 та мамлакат пайдо бўлди. Тожикистон, Қирғизистон, Туркманистон ва Америка Қўшма Штатларидаги савдо-саноат гуруҳлари билан тузилган шартномага кўра, уларнинг ҳар бирига йилига 5 миллион АҚШ доллари миқдорида тоза пахта матосидан тикилган трикотаж экспорт қилинадиган бўлди.

Кейинги 5 ой мобайнида бу ерда трикотаж маҳсулотларининг 5 та янги тури ўзлаштирилди. Бундан ташқари, пандемия, карантин шароитида фойдаланиладиган ниқоблар ва махсус конбензонлар ишлаб чиқариш ҳам йўлга қўйилди.

Зоҳир ТЎРАҚУЛОВ.