Қишлоқ хўжалигига мўлжалланган ерлар очиқ аукцион савдоларига чиқарилмоқда
Давлатимиз раҳбарининг 2025 йил 3 февралда қабул қилинган “Қишлоқ хўжалиги экин майдонлари унумдорлигини ошириш, тармоққа инвестициялар жалб қилиш учун қулай шарт-шароит яратиш бўйича навбатдаги чора-тадбирлар тўғрисида”ги Фармонида қишлоқ хўжалигига мўлжалланган ер участкаларини ажратиш тизимини очиқ ва шаффоф механизмлар асосида ташкил этиш белгиланган эди.
Шу асосда ер майдонлари “E-auksion” электрон савдо платформаси орқали онлайн аукцион асосида ижарага берилмоқда. Бу соҳада инсон омилини камайтириш, коррупциявий ҳолатларнинг олдини олиш ва барча тадбиркорлар учун тенг имконият яратишга хизмат қилмоқда.
Ер участкалари 3 гектардан 50 гектаргача бўлган ҳажмларда аукционга чиқарилмоқда ва унда нафақат маҳаллий тадбиркорлар, балки чет эл инвестициялари иштирокидаги корхоналар ҳам қатнашиши мумкин. Бу мамлакатимиз қишлоқ хўжалиги соҳасига замонавий технологиялар, инновациялар ва хорижий сармояларни жалб қилишга кенг йўл очади.
Мазкур фармон ижроси юзасидан жорий йил вилоятимизда аукцион савдоларига иккинчи босқичда чиқариладиган ер участкаларининг умумий ҳажми 3159,9 гектар бўлиб, бу ер майдонлари туман ҳокимликлари захирасига олиниб, давлат рўйхатидан ўтказилган ва шу асосда буюртмалар берилган.
Келиб тушган буюртма хатларига кўра, “Ўздаверлойиҳа” институти Самарқанд бўлинмаси томонидан 2944,5 гектар ер майдонлари бўйича 167 та лотлар тайёрланиб, “E-auksion” электрон савдо платформасига киритилган. Шундан, 114 та лот бўйича очиқ аукцион савдолари орқали 1794,4 гектар ер майдонларининг ғолиблари аниқланган. 42 та лот бўйича 935,4 гектар ер майдонлари аукцион савдосида, 11 та лот бўйича 214,7 гектар ер майдонлари идоравий келишув босқичи жараёнларида турибди.
С.Бобоназаров,
“Ўздаверлойиҳа” давлат илмий-лойиҳалаш институти
Самарқанд бўлинмаси директори.
