Жириновский айтган гаплар нега бугунга мос келмоқда?

У 30 йил давомида ЛДПРга раҳбарлик қилди. Россия Давлат Думасининг барча чақириқларида депутат бўлди. 6 марта президентликка номзодини қўйди, аммо сайланмади. Унинг жамоат олдидаги чиқишлари кўпинча шов-шувли можароларга сабаб бўларди. Кескин ва қатъий баёнотлари кўпчиликни ҳайратга солган. Айрим гаплари ҳатто телбаларча туюлган.

Фақат у вафот этгандан кейингина кўпчилик унинг айтган гаплари ҳақиқатда рўёбга чиққанини англай бошлади.

Бугун кўпчилик ижтимоий тармоқларда Владимир Жириновскийнинг турли йиллардаги чиқишларидан парчаларни улашмоқда. Сиёсатчининг баёнотлари кўп ҳолларда дунёда рўй бераётган воқеаларни аниқ акс эттиради. Илгари муболаға деб қаралган фикрлар бугун реалликка айланмоқда.

Айрим экспертлар бу хислатини интуицияси ўта ривожлангани билан изоҳламоқда. У Ванга эмас. Шунинг учун у келажакда “кўрган” нарсалар «олдиндан кўра билиш эмас», балки зўр таҳлил ва интуиция - ички ҳис натижаси. Интуиция бўлмаса, бунинг ҳеч бири бўлмас эди, дейишмоқда улар.

2019 йилда ЛДПР раҳбари 2024 йилга келиб Яқин Шарқда можаро бошланишини ва ҳамма Украина ҳақида унутиб қўйишини айтган эди. Бундан ташқари, у Россия ва АҚШ президентлари Сочида учрашиб, келишувга эришишини айтиб, буни 1945 йилги Ялта конференциясига ўхшатган.
1998 йилда Жириновский Украина НАТО билан яқинлашса, ҳалокатга учрашини айтган. Бир йил ўтиб эса уруш Украина ҳудудида бўлишини ва Ғарб айрим томонларни қўллаб-қувватлашини тилга олган.

Сиёсатчи Россия Хитой билан бирга бўлишини, кучли савдо уруши юзага келиши, ҳатто у ҳарбий тўқнашувга айланиши мумкинлигини, АҚШ заифлашиб, Хитой кучайишини ҳам башорат қилган.
Жириновский Эрон ҳақида гапириб, бу ерда энг оғир воқеалар бўлишини ва гап ҳатто учинчи жаҳон уруши ҳақида кетаётганини таъкидлаган.

Яқинда ижтимоий тармоқларда Жириновскийнинг Яқин Шарқдаги занжирли реакция ҳақида яна бир “башорат”и тарқалди — Эронга зарбадан тортиб Европа иқтисодиётигача бўлган инқирозгача. Мурожаатида у Исроил Эронга қарши ядровий қурол қўллаши мумкинлиги, Эрон эса Саудия Арабистонига жавоб зарбалари беришини айтган. Ҳурмз бўғози ёпилиб, нефть нархи баррели 400 долларгача ошиб кетиши ва бу Европада жиддий иқтисодий инқирозга олиб келиши, ушбу можаролар оқибатида миллионлаб қочқинларни пайдо бўлишини ишончли тарзда айтган.

Вақтида фикр ва таҳлиллари инобатга олинмаган Жириновскийнинг эндиликда руҳи билан «гаплашиш» ва бу урушлар натижаси ҳақида билиш истаги пайдо бўлди. Экстрасенсларга Жириновский руҳи махсус ҳарбий операция 2026 йил кузида якунланиши мумкинлигини «айтганмиш». Шунингдек, у Зеленский кетишини, Украина бўлиб олинишини, АҚШ парчаланиб, Дональд Трампга суиқасд бўлиши мумкинлиги ҳақида «огоҳлантиради», «Комсомольская правда» газетасида. Газетага кўра, у россияликларга картошка экишни «тавсия этган» ва иқтисодий вазият беқарор бўлишини «башорат қилган». Яқин Шарқ ҳақида эса вазият ядровий босқичгача етиши ва катта миграция бўлиши мумкинлигини «айтган».

Эслатиб ўтамиз: Владимир Жириновский 2022 йил 2 февралда коронавирус билан касалланиб шифохонага ётқизилган ва икки ойдан ортиқ даволанган. Шифокорлар уни сақлаб қололмади — 2022 йил 6 апрель куни вафот этди.

Гулнора Холдорова тайёрлади.