Хитой ва КХДР етакчилари нималарни имзолади?
Хитой раиси Си Цзиньпин душанба куни Шимолий Кореяга ташриф буюриб, икки мамлакат ўртасидаги «енгилмас дўстлик» ҳақида баёнот берди.
Бу унинг жорий йилдаги биринчи хорижий сафари бўлиб, Пекинда ўтказилган йирик халқаро саммитлардан кейин амалга оширилди. Шунингдек, бу Си Цзиньпиннинг 2019 йилдан буён Пхеньянга қилган илк ташрифидир.Си Цзиньпиннинг Шимолий Кореяга ташрифи унинг яқинда Пекинда АҚШ президенти Дональд Трамп ва Россия президенти Владимир Путин билан ўтказган учрашувларидан сўнг амалга оширилмоқда.
Кутилишича, Си Цзиньпин ва Ким Чен Ин икки кунлик музокаралар давомида муҳокама қиладиган масалалардан бири КХДРнинг ядровий қуролсизланиши бўлади. Вашингтон айнан шу масалада Хитой раҳбаридан муайян қадамлар кутаётгани айтилмоқда.
Си Цзиньпиннинг Пхеньянга ташрифидан бир кун олдин Ким Чен Иннинг синглиси ва КХДРда катта таъсир кучига эга Ким Ё Чжон Шимолий Кореянинг ядровий дастури «чекиниш мумкин бўлмаган марра» эканини маълум қилди.
Кўринишидан, Пекин бу жараёнга фаол тўсқинлик қилиш ниятида эмас.
Хуллас, КХДР раҳбари Ким Чен Ин ва Хитой раиси Си Цзиньпин Пхеньянда бўлиб ўтган музокаралар чоғида икки томонлама ҳамкорликни кенгайтириш ва икки давлат ўртасидаги стратегик мувофиқлаштиришни мустаҳкамлашга келишиб олди.
Ким Чен Ин Си Цзиньпиннинг ташрифи Пхеньян ва Пекин ўртасидаги муносабатлар юқори даражада эканини кўрсатиши ҳамда томонларнинг анъанавий дўстлик ва ҳамкорликни янада ривожлантиришга интилишини тасдиқлашини таъкидлади. Шунингдек, у КХДРнинг «ягона Хитой» тамойилига содиқлигини ва Пекин билан ҳамкорликни мустаҳкамлашга тайёрлигини билдирди.
Ўз навбатида, Си Цзиньпин Шимолий Кореянинг эришган ютуқларини юқори баҳолади ҳамда Хитойнинг икки давлат ўртасидаги анъанавий алоқаларни мустаҳкамлаш борасидаги ўзгармас позициясини тасдиқлади.
Бундан ташқари, икки мамлакат етакчилари Хитой ва Шимолий Корея ўртасидаги Дўстлик, ҳамкорлик ва ўзаро ёрдам тўғрисидаги шартноманинг 65 йиллигига бағишланган хотира тадбирларини ўтказишга келишиб олди.
