“Вақт капсуласи” – Ўзбекистон 50 йилдан кейин...
Болалигимдан китоб ўқишга, илм олишга қизиқишим кучли бўлган. Мактабда ҳам аниқ, ҳам табиий фанларни чуқурроқ ўзлаштиришга, тил ўрганишга интилганман.
Турли танлов ва фан олимпиадаларида қатнашиб, вилоят ва республика босқичларида фахрли ўринларни қўлга киритганман.
Математикага бўлган қизиқиш мактабни тугатганимдан кейин мени Тошкент давлат иқтисодиёт университетига етаклади. 4 йил давомида устозларим кўмагида кўплаб илмий мақолалар ёзиб, халқаро конференцияларда қатнашдим. Солиқ ва солиққа тортиш, бухгалтерия ҳисоби ва аудит, молия ва молиявий технологиялар каби мавзуларда ёзилган мақолаларим республика ва халқаро журналларда чоп этилган. Қолаверса, ўқув қўлланмалар, китоблар нашр эттирдим. Шунингдек, турли давлатларда ташкил этилган халқаро фан олимпиадаларида қатнашдим. Жумладан, 2023 йилда Россияда ўтказилган Евроосиё халқаро иқтисод олимпиадасида 100 дан ортиқ мамлакат вакиллари орасида биринчи ўринни қўлга киритдим.
Ўқишимни, яъни магистратура босқичини Жаҳон иқтисодиёти ва дипломатия университетида давом эттиришни мақсад қилгандим ва бунга ҳам эришдим.
Кўнглимда “Мард ўғлон” мукофотига сазовор бўлиш орзуси бор эди. Бу ният кеча ёки бугун эмас, мукофот таъсис этилган кундаёқ пайдо бўлганди. Бунга эришиш учун нималар қилишим кераклигини устозларимдан сўраганимда, улар менга мукофот низоми ҳақида атрофлича тушунча берганди. Устозларим айтганидек, ўз устимда ишлаб, халқаро тадбирларда қатнашиб, серқирра ижодкор бўлишга ҳаракат қилдим. Бугун эса ана шундай энг катта мақсадларимдан бирига эришдим.
Асосийси, бу мукофотни Давлатимиз раҳбарининг қўлларидан қабул қилиб олганим мени жуда хурсанд қилди, фахрлантирди.
Президентимиз менга мукофотни топшириш жараёнида “Келажакда ким бўлмоқчисан?”, деб савол берди. Мен етук иқтисодчи бўлишимни айтдим. Шавкат Мирзиёев бугунги кунда мамлакатмизда ёшларга яратилаётган имкониятлар бундан кейин ҳам кенгайиб боришини, бундан оқилона фойдаланишимиз кераклигини айтиб, мақсадимга эришишим учун ишонч билдирди. Бу албатта, менга илҳом бағишлади, шаштимга шашт қўшди. Мамлакатимиз иқтисодиёти ривожи йўлида, айниқса, унинг халқаро нуфузини ошириш учун амалга оширилаётган ислоҳотларга ўз ҳиссамни қўшишга ваъда бердим.
Аҳамиятлиси, тадбирдан сўнг Янги Ўзбекистон боғига бориб, “Вақт капсуласи”ни ўрнатдик. Биз шу пайтгача бўлган жараёнларни, яратилган имкониятлар ва эришган ютуқларимизни тарихга муҳрладик. 50 йилдан кейин, яъни 2075 йилда келажак авлод очиб, ўқиб кўради. Ишонаманки, ўшанда Ўзбекистон энг ривожланган мамлакатлар қаторида турган бўлади. Ёшлар эса ўз давридаги ютуқлар бугунги яратилаётган имкониятлар самараси эканлигига амин бўлади.
Феруз Ҳакимов,
“Мард ўғлон” мукофоти соҳиби.
