Samarqanddagi Oliy sport mahorati instituti faoliyatini boshlamasdan tugatilgan
Prezidentning 2022 yil 6 iyundagi “Oliy sport mahorati instituti faoliyatini tashkil qilish chora-tadbirlari to‘g‘risida”gi qaroriga ko‘ra, jismoniy tarbiya va sport sohasida yuqori malakali kadrlarni tayyorlash maqsadida Samarqandda Oliy sport mahorati instituti tashkil etilishi kerak edi.
Samarqand shahridagi Ibn Sino ko‘chasi, 17a-uy manzilida joylashgan mazkur institutda o‘qish davomiyligi 3 yil bo‘lib, 2023-2024 o‘quv yilida boks, dzyudo, yengil atletika, og‘ir atletika, erkin kurash, yunon-rum kurashi, taekvondo WT, suzish, akademik eshkak eshish, baydarka va kanoeda eshkak eshish, gandbol, basketbol va paralimpiya sport turlari bo‘yicha yuqori natijalarga erishib kelayotgan sportchilar qabul qilinishi belgilangan edi.
Biroq Prezidentning 2024 yil 28 maydagi «O‘zbekiston davlat sport akademiyasi faoliyatini tashkil qilish chora-tadbirlari to‘g‘risida»gi qaroriga ko‘ra, Oliy sport mahorati institutini tashkil etish qarori bekor qilingan va ayni paytda o‘z kuchini yo‘qotgan.
Mazkur qarorga ko‘ra, Oliy sport mahorati instituti negizida O‘zbekiston davlat sport akademiyasi tashkil etiladi va akademiya 2025-2026 o‘quv yilidan faoliyat boshlaydi.
Akademiyaga talabalarni qabul qilish parametrlari Respublika oliy ta’lim muassasalariga o‘qishga qabul qilishning davlat buyurtmasi doirasida belgilanadi.
Akademiya talabalarining kontingenti, birinchi navbatda, olimpiya va paralimpiya sport turlariga tayyorlash markazlarida rivojlantirilayotgan sport turlari bo‘yicha so‘nggi bir yilda Jahon, Osiyo va O‘zbekiston chempionatlarida g‘olib va sovrindor bo‘lgan olimpiya va paralimpiya kollejlari, shuningdek, umumiy o‘rta, o‘rta maxsus va professional ta’lim muassasalarining bitiruvchilari orasidan ularning sport natijalariga qarab, saralash (seleksiya) asosida shakllantiriladi.
Bunda, Olimpiya va paralimpiya kollejlaridan saralab olingan bitiruvchilar Akademiyaga to‘g‘ridan-to‘g‘ri ikkinchi bosqichga qabul qilinadi.
Akademiya bitiruvchilariga O‘zbekistonda oliy ta’lim to‘g‘risidagi hujjat sifatida tan olinadigan davlat namunasidagi diplom beriladi.
Akademiya talabalari sport va ommaviy jismoniy tarbiya tadbirlarining kalendar rejasiga muvofiq o‘tkaziladigan respublika musobaqalarida to‘g‘ridan-to‘g‘ri ishtirok etadi.
Akademiya bitiruvchilariga trenerlik faoliyati bilan shug‘ullanish uchun malaka sertifikati, istisno tariqasida, to‘g‘ridan-to‘g‘ri 6 yilga beriladi.
