Биринчи марта: Путин Киев билан музокаралар ўтказишни таклиф қилди. “Қрим кимники?” ва Украина учун тинчлик режасини Трамп ошкор этади. “Арман геноциди”ни инкор этиш учун муштлашув

🔹 Россия президенти Владимир Путин Украинага қарши кенг кўламли уруш бошланганидан бери биринчи марта икки томонлама музокараларни бошлаш ташаббусини илгари сурди. Бу ҳақда Reuters ахборот агентлиги хабар берди. Украина президенти Владимир Зеленский Путиннинг ташаббусига ҳозирча аниқ жавоб бермаган, бироқ Киев “ҳар қандай тинчлик музокараларига тайёр”лигини алоҳида таъкидлаган.

🔹 Исроил ва ҲАМАС гуруҳи ўртасидаги музокараларда воситачи бўлган Қатар ва Миср вакиллари ўт очишни тўхтатиш бўйича келишувнинг янги вариантини таклиф қилди. Таклиф беш йилдан етти йиллик сулҳ тузиш, Исроил қамоқхоналарида сақланаётган фаластинлик асирлар эвазига барча гаровга олинган исроилликларни озод қилиш, урушни расман тугатиш ва Исроилнинг Ғазо секторидан тўлиқ чиқиб кетишини ўз ичига олади.

🔹 АҚШ президенти Доналд Трамп Украинанинг Қримни Россия ҳудуди деб тан олиши ҳақидаги саволга жавоб берар экан, бу ҳақда уч кун ичида батафсил айтишини маълум қилди ва Украина бўйича тинчлик режасининг мазмунини ошкор қилишга ваъда берди. Бу режа ўт очишни тўхтатиш бўйича келишувга эришилгандан сўнг Украинага Европа қўшинларини жойлаштиришни ўз ичига олиши мумкин.

🔹 Украина, Британия, Франция ва АҚШ вакиллари эртага, 23 апрель куни Лондонда учрашиб, Россия билан урушни тугатиш йўлларини муҳокама қилади. Бу ҳақда Украина президенти Владимир Зеленский ўзининг Х тармоғидаги аккаунтида маълум қилди.

🔹 Ватиканда Рим папаси Франциск билан видолашув маросими бошланди. Трамп ва Зеленский 26 апрель куни ўтадиган дафн маросимида қатнашиш учун Ватиканга боради. Россия маросимда иштирокини маълум қилмаган.

🔹 Арманистон парламентида “Фуқаролик шартномаси” фракцияси аъзолари ва “Арманистон” мухолифат блоки вакиллари ўртасида муштлашувга айланган жанжал юзага келди. Можаро Арманистон фракцияси “арман геноциди”ни инкор этишни жиноий жавобгарликка тортувчи қонун лойиҳаси киритилишини эълон қилганидан кейин бошланган.

🔹 Исроил ҳаво кучлари Эронга эҳтимолий зарба беришга тайёргарлик кўриш учун машғулотларни бошлагани айтилмоқда. Бундан ташқари, Исроилнинг сўнгги 24 соат ичида Ғазо секторига берган зарбалари оқибатида камида 29 киши ҳалок бўлган.

🔹 Ливандаги Ҳизбуллоҳ ҳаракати қуролсизланиш жараёнига таҳдид сифатида қарамайди ва фақат сиёсий ва дипломатик контекстда қурол узатиш масаласини муҳокама қилишга тайёр. "Ҳеч ким бизга куч билан таҳдид қилгани йўқ ва қилмайди ҳам. Барчаси мулоқотда ҳал бўлади. Биз президент Жозеф Аунга ҳам, Ливан армиясига ҳам салбий нуқтаи назарга эга эмасмиз. Аксинча, биз алоқага чиқишга ва ечим излашга тайёрмиз", деб таъкидлади "Известия" манбаси.

🔹 Америкалик миллионерлардан олинадиган даромад солиғини 40 фоизга ошириш 10 йил ичида АҚШ ғазнасига тахминан 400 миллиард доллар қўшиши мумкин. Айни пайтда Қўшма Штатларда энг юқори даромад солиғи ставкаси 37 фоизни ташкил қилади.

🔹 Ғалаён содир этганликда айбланаётган Жанубий Кореянинг собиқ президенти Юн Сок Юл устидан суд жараёни 2025 йил охиригача давом этади. Собиқ президентни максимал жазо: умрбод қамоқ ёки мамлакатда 1997 йилдан бери қўлланилмаган ўлим жазоси кутмоқда.

Г.Холдорова тайёрлади.