900 нафарга яқин ёшлар “Ипак йўли”ни танлади
Кеча “Ипак йўли” туризм ва маданий мерос халқаро университетида ҳам 2026–2027 ўқув йили бошланди.
Бу йил мазкур университет бакалвриатига 890 нафар талаба қабул қилинди. Улар учун ташкил этилган таништирув ҳафталиги аввалида университет ректори Муҳсинжон Холмухаммедов иштирок этиб, талабаликка қабул қилинган ёшларни табриклади.
– Минглаб тенгдошларингиз орасидан сизлар энг билимли, зукко бўлиб, талабалик бахтига эришиб турибсиз, – деди ректор. – Бу муваффақият билан сизларни, оила аъзоларингизни табриклайман. Талабалик инсон ҳаётидаги энг унутилмас ва шу билан бирга масъулиятли давр. Сиз университетда кечадиган тўрт йиллик таълим жараёнининг ҳар бир дақиқасидан самарали фойдаланиб, танлаган йўналишингизнинг энг етук мутахассиси бўлишга интилинг. Келгусида туризм соҳасида ишлайсизми, бошқа соҳадами, талабалик даврида эгаллаган билим, кўникмангиз ҳаётда ўз йўлингизни топишингизга пойдевор бўлади. Бугундан ана шу пойдеворни мустаҳкам қилиб қўйишга ҳаракат қилинг. Бу йўлда биз сизнинг яқин кўмакчингиз бўламиз.
Тадбирда университет профессор-ўқитувчилари, талабаликка қабул қилинган ёшларнинг ота-оналари сўзга чиқиб, ёшларга муваффақият тилади. Ўқишга киришда юқори натижа қайд этган талабаларга ташаккурнома ва эсдалик совғалари топширилди.
