Қурувчининг қадри қанча?

Юртимизда кейинги йилларда бунёдкорлик ишлари кўлами ниҳоятда кенгайган. Бундай ишларни, аниқроғи қурилиш объектларини кузатганмисиз? Чанг-тўзон кўтарилиб ётган ҳудуд. Қўллари лой ёки қоришмага ботган ишчилар. Ортилган юкнинг меъёридан ортиқлигидан базўр ҳаракатланаётган машиналар…

Аксарият ҳолларда шундай бўлади. Ҳа, яна қурилиш майдонининг атрофи ўралмайди. Бу ерда нима барпо этилаётгани, унинг қачон битиши ҳақида ҳеч қаерда, ҳеч қандай маълумот қўйилмайди.

Яқинда вилоят қурилиш бош бошқармаси ташаббуси билан ташкил этилган пресс-тур сабаб вилоятда амалга оширилаётган бунёдкорлик ишлари билан танишиб, бунга яна бир бор гувоҳ бўлдик. Кимда қандай таассурот қолдирди, билмадиму, бизда қурувчининг қурилиш материаличалик қадри йўқ экан, деган тасаввур пайдо бўлди.

Кўпчилик билса керак, айни шу масала йил аввалида халқ депутатлари вилоят Кенгаши депутатлари эътиборига тушди. Улар бир-иккита объектда ишчиларга яратилган шароитларни ўрганди. Аммо нима учундир масала, сувга чўккан тошдек изсиз кетди.

Бу борада ишчи-ходимлар манфаатини ҳимоя қилувчи ташкилот - касаба уюшмалари ҳам газетамиздаги қайсидир чиқишида эслаб ўтганди. Бироқ уларнинг ҳам айтарли нимадир қилгани номаълум.

Пресс-тур давомида дастлаб кўҳна кентнинг ҳаво дарвозаси - аэропортда олиб борилаётган қурилиш-таъмирлаш ишлари билан яқиндан танишдик. Ишонасизми, катта (балки вилоятдаги энг каттадир) объектда заррача чанг йўқ. Энг ажабланарлиси, чет эллик қурувчилар бош бўлган объект ҳудудида қўли лой ёки қоришмадан кир бўлган ишчини учратмайсиз. Бу ерда юрган ҳар бир одам озодалиги жиҳатидан камида офис хизматчисини эслатади.

- Қурилишда ҳам шунақа озода юриш мумкин эканда, - деди ҳамкасбларимиздан бири. - Нега булар оёқ остига блок териб, бошга рўмол ўраб ишламайди? - аччиқ кесатиқ билан давом этди бояги ҳамкасбим.

Яна бир ҳайратланарли жиҳати шундаки, ҳар бир ишчи учун максимал қулайлик яратилган.

- Ахир қурилиш дегани оғир иш, ҳамма нарсани техникага юклаб қўйиш, бу камида соҳанинг «обрў»сини тушириб юборадику! - “Саёҳат” сўнгида ҳамкасбим шу тахлит фикр билдирди.

Менимча, биздаги аксарият қурилиш корхоналари раҳбарлари ҳам шундай фикрлашади. Агар аксинча бўлганда, қурилишларимизда тартиб ўрнатилган, қурувчилар ҳам бунёдкорлик ишларидан роҳатланиб, меҳнат қилган бўлмасмиди?!

- Аэропорт қурилишида олти ойдан бери ишлаяпман, - дейди ўзини таништиришни истамаган ўзбекистонлик қурувчи. - Тўғри, бу ерда асосан бўёқ, сувоқ каби “қора” ишларни қиламиз. Лекин кийим-бошдан тортиб, бепул тушлик ва бошқа қулай шароитлар яратилган. Хафсизлик талабларига риоя қилиниши тегишли назоратчилар томонидан доимий ўрганиб борилади.

Ўзимизнинг қурувчилар бош бўлган объектлар ҳақида ёзмоқчи эмасман. Лекин бир савол тинчлик бермайди, биздаги бошқа қайси объектда оддий ишчи-қурувчининг қадри юқоридагидек?

Фазлиддин РЎЗИБОЕВ.