Маиший чиқиндиларни олиб чиқиб кетиш хизматлари учун тўлов ўзгарди

Ҳудудларда маиший чиқиндиларни тўплаш ва олиб чиқиб кетиш бўйича кўрсатиладиган хизматлар учун тўлов тарифларини тасдиқлаш тўғрисида

Самарқанд вилояти ҳокимининг Қарори

 «Чиқиндилар тўғрисида»ги Ўзбекистон Республикаси Қонунининг 11-моддаси, Ўзбекистон Республикаси Президентининг 2020 йил 29 сентябрдаги «Маиший ва қурилиш чиқиндилари билан боғлиқ ишларни бошқариш тизимини янада такомиллаштириш чора-тадбирлари тўғрисида»ги ПҚ-4845-сон, Вазирлар Маҳкамасининг 2019 йил 6 февралдаги «Чиқиндилар билан боғлиқ ишларни амалга ошириш соҳасидаги норматив-ҳуқуқий ҳужжатларни тасдиқлаш тўғрисида»ги 95-сон қарорларига асосан ҳудудлардан маиший чиқиндиларни олиб чиқиб кетиш хизматларини такомиллаштириш, ҳудудларнинг экологик ва санитария ҳолатини янада яхшилаш мақсадида ҚАРОР ҚИЛАМАН:

1. Халқ депутатлари вилоят Кенгашининг 2024 йил 29 апрелдаги VI-98-34-7-0-K/24-сон қарори билан вилоятда маиший чиқиндиларни тўплаш ва олиб чиқиб кетиш бўйича хизмат кўрсатиш учун мажбурий тўлов тарифлари миқдори маъқулланганлиги маълумот учун қабул қилинсин.
2. Шаҳар ва туманларда маиший чиқиндиларни тўплаш ва олиб чиқиб кетиш бўйича кўрсатиладиган хизматлар учун тўлов тарифлари иловага мувофиқ тасдиқлансин.
3. Вилоят экология, атроф-муҳитни муҳофаза қилиш ва иқлим ўзгариши бошқармаси (К.Шерматов), вилоят «Тоза ҳудуд» ДУК (Б.Латипов), «Мароқанд обод» ДУК (Р.Тўлкинов) санитар жиҳатидан хизмат кўрсатувчи корхоналар шаҳар ва туман ҳокимликлари билан биргаликда:

- бир ой муддатда фуқароларнинг ўзини ўзи бошқариш органлари билан ҳамкорликда қаттиқ ва суюқ маиший чиқиндиларни йиғиш ва олиб чиқиш хизматини рўйхат бўйича абонентлари бўлган юридик ва жисмоний шахслар билан шартномалар тузиш ва тўловларнинг ўз вақтида амалга оширилишини таъминлаш бўйича ишларни самарали ташкил этишни;

- аҳоли пунктлари ҳудудидан қаттиқ ва суюқ маиший чиқиндиларни олиб чиқиш хизмати бўйича маршрутлар жадвалларини қайта кўриб чиқиб, ўрнатилган тартибда тасдиқланишини ва ушбу жадваллар асосида чиқиндилар ташилишини амалга оширишни таъминласин.

4. Вилоят иқтисодиёт ва молия бош бошқармаси (Б.Мирзаев), вилоят ғазначилик бошқармаси (О.Ҳамдамов) билан биргаликда:

- бюджетдан маблағ билан таъминланадиган ташкилотларнинг харажатлар сметасида қаттиқ ва суюқ маиший чиқиндиларни ташиб чиқариш харажатлари бўйича белгиланган нормативлар асосида зарур маблағлар режалаштирилишини;

- вилоят «Тоза ҳудуд» давлат унитар корхонаси, «Мароқанд обод» давлат унитар корхонаси ва санитария жиҳатидан тозалашга ихтисослаштирилган ташкилотлар билан бюджет ташкилотлари ўртасида тузиладиган тегишли шартнома шартларига кўра маблағларнинг ўз вақтида молиялаштирилишини таъминласин.

5. Вилоят телевидениеси (М.Ихтиёров), «Зарафшон» ва «Самаркандский вестник» газеталари таҳририяти (Ф.Тошев), вилоят экология, атроф-муҳитни муҳофаза қилиш ва иқлим ўзгариши бошқармаси (К.Шерматов), вилоят соғлиқни сақлаш бошқармаси (С.Зайниев), вилоят санитария-эпидемиологик осойишталик ва жамоат саломатлиги бошқармаси (М.Насритдинова)га шаҳар ва туманлар ҳокимликлари билан биргаликда аҳолининг кенг қатламлари орасида фуқароларнинг ҳуқуқий ва санитария-экологик саводхонлигини оширишга қаратилган тушунтириш ишларини ташкил этиш тавсия этилсин.
6. Вилоят ҳокимининг 2023 йил 13 ноябрдаги «Ҳудудларда маиший чиқиндиларни тўплаш ва олиб чиқиб кетиш бўйича хизмат кўрсатиш учун мажбурий тўлов тарифлари миқдорини тасдиқлаш тўғрисида»ги 319-7-0- Q /23-сон қарори ўз кучини йўқотган деб ҳисоблансин.
7. Вилоят ҳокимлиги ахборот хизмати – матбуот котиби (М.Мирзаев), «Ахборот-коммуникация технологияларини ривожлантириш маркази» МЧЖ (Н.Норбеков) ушбу қарорни Lex.uz - Ўзбекистон Республикаси қонунчилик маълумотлари миллий базасида расман эълон қилинишини ва вилоят ҳокимлигининг расмий веб-сайтига жойлаштирилишини таъминласин.
8. Ушбу қарор ижросини назорат қилиш вилоят ҳокимининг ўринбосари А.Шукуров зиммасига юклатилсин.
9. Ушбу қарор расман эълон қилинган кундан бошлаб кучга киради.

Вилоят ҳокими                                   Э.Турдимов

2024 йил 7 июнь              150-7-0-Q/24

ИЛОВА

Шаҳар ва туманларда маиший чиқиндиларни тўплаш ва олиб чиқиб кетиш бўйича кўрсатиладиган хизматлар учун тўлов тарифлари