Хорижга чиқиш паспорти учун тўлов арзонлаштирилади
Ягона интерактив давлат хизматлари порталига кўра, 2022 йил 1 январдан бир қатор давлат хизматларини кўрсатилиши учун ундириладиган тўловлар камайтирилмоқда ва айримлари учун тўлов бекор бўлмоқда. Бу Президентнинг «Давлат хизматлари кўрсатиш инфратузилмасини такомиллаштириш ва аҳолининг давлат хизматларидан фойдаланиш имкониятларини кенгайтириш чора-тадбирлари тўғрисида» Фармонида назарда тутилган.
Жумладан, Ўзбекистон Республикаси фуқароларига хорижга чиқиш учун биометрик паспорт бериш учун тўлов миқдори аввал базавий ҳисоблаш миқдори (БҲМ)нинг 1,2 баравари бўлса, эндиликда БҲМнинг 1 баравари этиб белгиланади.
Тадбиркорлик субъектларига давлат рўйхатидан ўтказилганлиги тўғрисида янги намунадаги гувоҳнома бериш аввал базавий ҳисоблаш миқдорининг 1 баравари бўлса, эндиликда БҲМнинг 20 фоизи миқдорида этиб белгиланади.
Шунингдек, хусусий бандлик агентликлари реестрига киритиш учун тўлов аввал БҲМнинг 1 баравари бўлса, эндиликда бепул этиб белгиланади.
Адвокатлик бюроларини, адвокатлик фирмаларини ва адвокатлар ҳайъатларини давлат рўйхатидан ўтказиш учун тўлов аввал БҲМнинг 2 баравари миқдорида бўлган бўлса, эндиликда БҲМнинг 1 баравари этиб белгиланади.
Хорижга чиқиш паспортини осон расмийлаштириш йўли қуйидаги видеолавҳада акс эттирилган.
