“Победа” автомобиллари Самарқандга нега етиб келолмади?
Бугун Самарқандга медиа-экспедиция иштирокчилари режалаштирилган муддатдан аввал етиб келишди. Бироқ машиналарсиз.
Кеча 5 та “Победа” ва 2 та “Патриот” автомобилларида 15 нафар жаҳонгашта россияликлар Тошкент шаҳрида кутиб олинган эди.
Жамоа аъзолари бугун Самарқандга келиб, Ҳазрати Хизр мажмуасида Биринчи Президентимиз Ислом Каримов мақбарасини томоша қилди. Сўнгра Хотира майдонида Мотамсаро она ҳайкали пойига гул қўйилиб, Иккинчи жаҳон урушида ҳалок бўлган инсонлар ёд этилди. Россиялик меҳмонлар бу ерда самарқандлик уруш фахрийлари, ёшлар ва жамоатчилик вакиллари билан учрашди.
Ёши 90 дан ошган Евгений Солдатов ва Михаил Колмогоров меҳмонлар билан мулоқотда бўлиб, уларнинг саволларига жавоб беришди.
Шундан сўнг меҳмонлар Самарқанддаги тарихий обидаларни зиёрат қилишди.
- Биз 2018 йилги экспедициямизни Иккинчи жаҳон урушида фронт ортида меҳнат қилганларга бағишладик, - дейди Югра Думаси қошидаги Ёшлар парламенти аъзоси Анна Грибинча. – Биз уларга ҳурмат бажо келтиришни мақсад қилдик.
Медиа-экспедиция ташкилотчиларининг таъкидлашича, автомобилларнинг Самарқандгача етиб кела олмаганининг сабаби иссиқ об-ҳаводир. Машиналар бундай шароитда тез қизиб, двигателлари ишдан чиқиши мумкин экан.
Режага кўра, медиа-экспедиция 9 майда Нижневартовскгача етиб бориши лозим.
Ушбу тадбир Россиянинг Ханти-Мансийск автоном округи Думаси қошидаги Ёшлар парламенти томонидан ташкиллаштирилган.
Машиналар Россия, Қозоғистон, Қирғизистон ҳамда Ўзбекистон шаҳарларидан ўтиб Тошкентгача етиб келган.
Замира БОЛТАЕВА (фото)
