Масъулиятсиз масъуллар вазифасига нолойиқ деб топилди
Бугун, 11 июль куни Самарқанд вилояти ҳокимлигида маданий мерос объектларини муҳофаза қилиш ва улардан фойдаланишда қонун талабларига риоя этиш, кўп йиллик дарахтларни асраб-авайлаш борасида олиб борилаётган ишлар атрофлича муҳокама этилди.
Вилоят ҳокимлиги ахборот хизматининг хабар беришича, муҳокамада вилоят ҳокимлиги, вилоят прокуратураси, соҳага масъул корхона ва ташкилотлар раҳбарлари иштирок этди.
Вилоят ҳокими Э.Турдимов маданий мерос объектларида олиб борилаётган реставрация жараёнида ҳудудни ободонлаштириш, чинор, тол каби кўп йиллик дарахтларни асраш ҳамда шаҳримизга ташриф буюраётган меҳмонлар ва туристларга зарур шарт-шароит яратиш борасида йўл қўйилаётган хато-камчиликларни танқид қилди. Шунингдек, ижтимоий тармоқларда Самарқанд шаҳрида “Парк-озеро” номи билан юритиладиган дам олиш масканида “Александр” меҳмонхонаси маъмурияти ва улар жалб қилган қурувчилар томонидан кўп йиллик чинорнинг ҳеч қандай рухсатсиз кесилиши атрофлича муҳокама қилинди.
Муҳокама давомида вилоят прокуратураси томонидан уч кун муддатда мазкур ҳолат атрофлича ўрганиб чиқилиши, айбдорларга нисбатан қонуний жазо чоралари кўрилиши ва жамоатчиликка билдирилиши маълум қилинди.
Самарқанд вилояти ҳокимлиги котибият мудири Улуғбек Облоқулов ҳамда вилоят экология ва атроф муҳитни муҳофаза қилиш инспекцияси ходими Алишер Муҳаммадиевларни маъмурий жавобгарликка тортиш тўғрисида маъмурий судга мурожаат қилиниши белгиланди.
Атроф муҳитни муҳофаза қилиш соҳасида ва тизим бошқарувида қўпол хатоликларга йўл қўйганлиги учун вилоят экология ва атроф муҳитни муҳофаза қилиш бошқармаси бошлиғи Ғолиб Негматов эгаллаб турган вазифасига нолойиқ эканлиги қайд этилди. Худди шундай Регистон ансамблини таъмирлаш ва ундан фойдаланиш мустақил дирекцияси директори Беҳруз Маъруфи ҳам Регистон мажмуасини таъмирлаш учун ҳеч ким билан келишмасдан, мардикор жалб қилгани, ишдаги масъулиятсизлиги учун вазифасига нолойиқ эканлиги таъкидланиб, уларни эгаллаб турган лавозимидан бўшатиш тўғрисида юқори турувчи идораларга тақдимнома киритилди.
Шунингдек, ўзига юклатилган вазифаларни бажаришда сансоларликка йўл қўйганлиги, ўз ишига масъулиятсизлик билан ёндашганлиги учун Бибихоним мажмуаси раҳбари Гулбаҳор Оқилова тегишли кенгашдан рухсатнома олмасдан Бибихоним мажмуасида замонавий ликсан ўрнатганлиги (бугунги кунда ликсан олиб ташланиб, эски ҳолатига қайтарилди) учун расман огоҳлантирилди ҳамда вилоят музейлар бошқармаси бошлиғининг хўжалик ишлари бўйича ўринбосари Холиқул Ражабовга “хайфсан” интизомий чора қўлланилди.
Муҳокама якунида мазкур йўналишда хато ва камчиликларга йўл қўйилиши кечирилмаслиги, қатъий жазо чоралари кўрилиши қайд этилди.
