Андроид қурилмалар учун Zarnews.uz мобил иловаси. Юклаб олиш x

Ўзини ўзи молиялаштирадиган ОТМлар рўйхати тасдиқланди

Ўзбекистон Республикаси Вазирлар Маҳкамасининг "Олий таълим муассасаларини босқичма-босқич ўзини ўзи молиялаштириш тизимига ўтказиш тўғрисида"ги қарори қабул қилинди. Бу ҳақда Адлия вазирлиги ахборот хизмати хабар берди.

Қарор билан 2020 йил 1 январдан бошлаб, тажриба-синов тариқасида ўзини ўзи молиялаштириш тизимига ўтаётган 10 та олий таълим муассасалари рўйхати тасдиқланди.

Бунда ушбу ОТМларнинг илмий педагогик салоҳияти юқорилиги, молиявий фаолиятининг барқарорлиги, моддий-техника базаси етарли даражадалиги, таълим хизматлари бозорида мазкур мутахассисликларга талаб юқорилиги инобатга олинди.

Шунингдек, ўзини ўзи молиялаштириш тизимига ўтаётган ОТМларга бир қатор қўшимча вазифалар белгиланди.

Қўшимча таълим хизматларини кўрсатиш, иқтисодиёт тармоқлари мутахассисларининг малакасини ошириш ва бошқа пуллик хизматларни жорий этиш шулар жумласидандир.

Қарорга мувофиқ, ўзини-ўзи молиялаштириш тизимига ўтаётган ОТМда тўлов-контракт асосида таълим олаётган талабаларнинг контракт тўлаш муддатлари томонлар келишувига кўра, шартнома асосида белгиланади.

Маълумот учун, Президентнинг 2019 йил 11 июлдаги қарори билан 2020 йилдан бошлаб айрим ОТМлар босқичма-босқич ўзини ўзи молиялаштириш тизимига ўтиши белгиланган.