Эътироф бизга янги куч ва масъулият бағишлайди
Инсон ҳаётида шундай унутилмас лаҳзалар бўладики, унда йиллар давомида қилинган меҳнат, эзгу ният ва фидойиликнинг қадри янада чуқурроқ ҳис этилади. Эътироф — ана шундай қувончли туйғуларни уйғотадиган, инсонни янада катта мақсадлар сари руҳлантирадиган юксак баҳодир.
Бу йил мамлакатимиз ҳаётидаги энг улуғ ва қадрли саналардан бири — Ўзбекистон Республикаси давлат мустақиллигининг 35 йиллик шонли айёми кенг нишонланмоқда. Мустақиллик йилларида юртимизда барча соҳалар қатори диний, маънавий-маърифий йўналишга ҳам алоҳида эътибор қаратилиб, халқимиз, айниқса, хотин-қизлар билан ишлаш, оилавий қадриятларни мустаҳкамлаш, ёш авлод тарбиясида отинойиларнинг муносиб ўрни шаклланди.
Ана шу эътиборнинг яна бир ёрқин ифодаси сифатида мен ва яна 10 нафар отинойимиз «Ўзбекистон Республикаси мустақиллигининг 35 йиллиги» эсдалик кўкрак нишони билан тақдирландик.
Бу юксак эътирофни катта қувонч ва чексиз миннатдорчилик билан қабул қилдик. Зеро, ҳар қандай мукофот замирида инсоннинг меҳнатига берилган баҳо, унга билдирилган ишонч ва эътибор мужассам.
Отинойи сифатидаги фаолиятимизда одамлар билан суҳбатлашиш, уларнинг дарду ташвишларига қулоқ тутиш, оилаларда тинчлик-тотувликни мустаҳкамлаш, хотин-қизларимизни маънавий-маърифий билимлар билан бойитиш, ёшларни эзгулик, ҳалоллик, меҳр-оқибат ва ватанпарварлик руҳида тарбиялашга ўз ҳиссамизни қўшишни муҳим вазифамиз деб биламиз.
Албатта, бу йўлдаги меҳнат ҳар доим ҳам кўзга ташланавермайди. Аммо инсон қалбига айтилган бир эзгу сўз, бир оилани яқинлаштирган самимий суҳбат, бир ёшнинг тўғри йўлни танлаши — биз учун энг катта натижадир.
Шу маънода, бизга топширилган ушбу кўкрак нишонини нафақат шахсий мукофот, балки отинойиларнинг жамият маънавий ҳаётидаги ўрнига берилган юксак эътироф сифатида қабул қиламиз. Бу эътироф бизга янада катта масъулият юклайди. Бундан буён ҳам юртимиз тинчлиги ва осойишталиги, оилалар мустаҳкамлиги, халқимиз маънавияти юксалиши йўлида бор билим ва тажрибамизни аямасликка ундайди.
Бизга билдирилган юксак ишонч учун юртимиз раҳбариятига, ушбу мукофотга муносиб кўрган мутасадди ташкилотларга самимий ташаккур билдирамиз.
Бугун кўксимизда порлаб турган кўкрак нишонига қарар эканмиз, унда нафақат 35 йиллик мустақилликнинг шарафли тарихи, балки халқимизга хизмат қилишдек улуғ масъулиятни ҳам кўрамиз.
Биз учун бу мукофот — меҳнатимизга берилган эътироф, қалбимизга берилган далда, келгуси фаолиятимиз учун эса янги масъулиятдир.
Н.Темирова,
Ўзбекистон Мусулмонлар идораси Самарқанд вилояти бош имом хатибининг хотин-қизлар масалалари бўйича ўринбосари.
