Авиачипта  учун  250  000  доллар!

Бу  эркак  умрбод  чексиз  парвоз  қилиш  имконини  берувчи  чипта  сотиб  олганди,   20  йил ўтгач,  у  ёқимсиз бир ҳолатга  дуч  келди.

1987  йилда  “American  Airlines”  авиакомпанияси  умрбод  ва  чексиз  парвоз  қилиш  имконини  берувчи  чипталарни  чегирма  билан  харид  қилиш  мумкин бўлган «AAirpass»  аъзолик  дастурини  эълон  қилди.

Бу  таклифдан  бор-йўғи  бир  неча  киши,  жумладан,  Стивен  Ротштейн  исмли  ашаддий  саёҳатчи  фойдаланди.  Биржа  брокери  касбини  олган  Ротштейн  рейслардаги  биринчи  классда  чексиз  парвоз  қилиш мақсадида ушбу  чиптани  ўзига  хос  фойдали  сармоя  ҳисоблаб,  уни  250  000  АҚШ  долларига  харид  қилди.

Саноқсиз  мамлакатларга  ташриф  буюриш  ва  турли  маданиятлар  билан  яқиндан  танишиш  имконини қўлга  киритган   Ротштейн   кейинги  йигирма  йил  давомида  10  мингдан  ортиқ  парвозни  амалга  ошириб,  чинакам    “учар  инсон”га  айланди.  Энг  севимли  йўналиши  Париж  шаҳрига Стивен  кўпинча  нонушта,  тушлик  ёки  кечки  овқат  қилиш  учун  учиб  борар  ва  ўша  куннинг  ўзида  АҚШга  йўл  олар эди.

Кунларнинг бирида   Стивен  Ротштейн   чиптаси  бекор  қилинганини  билиб  қолди.

Нега  бундай  бўлди?

Дастлаб  “American  Airlines”   ҳатто  энг  бадавлат  инсон  ҳам  тахминан  20  йил  давомида  бепул  учган  тақдирда  авиакомпания  барибир  фойда  кўришига  амин  эди.  Улар  бу  мижоз  "чексиз"  сўзини  сўзма-сўз  тушуниб,  бор-йўғи  йигирма  йил  ичида  10  мингдан  ортиқ  парвоз  қилишга  қарор  қилганини  олдиндан  кўра  билмаган  эди-да.  Авиакомпания  Стивен  саёҳатлари  бўйича  маълумотларни  синчковлик  билан  ўрганиб  чиқди  ва  унинг  ҳаво  қатновларига  20  миллион  доллардан  ортиқ  маблағ  сарфлаганини  аниқлади.

Молиявий  йўқотишлар ва судлардаги оворагарчиликларнинг  олдини  олиш  мақсадида  авиакомпания  Ротштейнга  ушбу  чиптадан  воз  кечиши  эвазига  400  000  доллар  таклиф  қилиб   кўрди,  бироқ  у  рози  бўлмади.

2008  йилда  Боснияга  сафарга  отланаётган  пайтида  аэропортда  унга  фирибгарлик  ҳаракатлари  туфайли  чипта  бекор  қилингани  айтилди.

-  Ўзимни  хўрланган, алданган  ва  хиёнатга  учрагандек  ҳис  қиляпман.  Улар  менинг  севимли  машғулотимни,  ҳаётимни  тортиб  олишди,  менинг  шахсиятимни  барбод  қилишди.  Биз  ўзлари  истаган  ишни  қила  оладиган  улкан  кучга  эга  йирик  корпорациялар  асиримиз.  Улар  билан  курашиш  ниҳоятда  қийин,  -  деди  ўшанда  Ротштейн  берган  интервьюсида.

-  Ахир  улар  шартнома  имзолаган  эди  —  шартнома  эса  шартномадир,  энди  мени  фирибгарликда  айблашаяпти,  шартлар  бузилди,  ҳолбуки,  ҳужжатда  мен  бузишим  мумкин  бўлган  ҳеч  қандай  сабаб  йўқ  эди,  -  қўшиб  қўйди  у.

Ротштейн  авиакомпанияни  судга  берди.  Суд  жараёни  бир  неча  йилга  чўзилиб  кетди.   2012  йилда  «American  Airlines”  компанияси  банкротлик  тўғрисида  ариза  топширганида  суд  иши  тўхтатиб  қўйилди.  2013  йилда  авиакомпания  банкротлик  ҳолатидан  “сувдан  қуруқ”  чиқди.

Нима  бўлган  тақдирда  ҳам  Ротштейн  ўз  харажатларини  ортиғи  билан  қоплаб  олди.  У  нафақат  унутилмас  саёҳат  таассуротларига  эга  бўлди,  балки  ҳар  бир  парвоз  учун  алоҳида  чипта  сотиб  олишга  ҳожат  қолдирмай,  катта  миқдордаги  маблағини  ҳам  тежаб  қолишга  муваффақ  бўлди.

Баҳора  Муҳаммадиева  тайёрлади.