Дунёда қанча метро бор?
Дунёда ерости транспорти ҳисобланган метролар сони 414 тадан 168 тагача саналади.
Айримлари билан танишинг:
Лондон метроси дунёдаги энг қадимги хисобланади. У 1863 йилда очилган ва буғ билан ишлайдиган машина ёрдамида ҳаракатланган. Фақат 1896 йилда электровозлар билан жиҳозланган. Лондон метросининг ярмидан кўпроғи юзадан ўтади. Йўлнинг айрим ерости қисми оддий тоғ туннелларидан иборат. Лондон метросининг узунлиги 408 километр. У 11 та линия ва 268 та станциядан ташкил топган.
Иккинчи ўринни Париж метроси эгаллайди. 1900 йилда очилган. Кўпчилик станциялар орасидаги масофа узоқ эмас. Платформада кетаётиб сал эгилиб қарасангиз бемалол навбатдаги бекатни кўришингиз мумкин. Шуниси қизиқки, айрим линияларда вагон эшиклари фақат қўл билан очилади. Метрога тушиш йўлаклари айвонли қилиб қурилган. Ҳокимият ҳозирда замонавий тарзда янгиламоқда. Бироқ парижликлар бундан норози, улар қадимги ерости иншооти Эйфел минораси сингари ўтмиш ёдгорлиги бўлиб қолиши тарафдори.
Чуқурлиги бўйича дунёда Санкт-Петербург метроси етакчи ва энг қадимги хисобланиши мумкин эди. У 1820 йилда лойиҳалаштирилган, аммо жуда кўп фожиавий сабабларга кўра фақат 1941 йилга келиб қурила бошлаган, 1955 йилда очилган. Чуқурлиги 60 метр. Сизот суви ва ботқоқлик қурувчиларни шундай чуқурликда метро барпо этишга мажбур қилган.
Энг тирбанд ерости транспорти Токио метроси ҳисобланади. Айрим вагонлар фақат аёллар ва болаларга мўлжалланган. Япон метросида тўлов тизими жуда чалкаш. Ҳар бир станцияда тўлов ҳар хил, бирида чипта сотиб олсангиз, бирида автомат касса амал қилади. Токио метроси хавфсизлик нуқтаи назаридан сув тошқини, зилзилага қарши тизим билан жиҳозланган: фалокат рўй берса метро автоматик равишда тўхтайди ва барча эшиклар зич ёпилади.
Пекин метроси узоқ вақт энг ёпиқ ерости транспорти ҳисоблаб келинган. 1960 йилда қурилиши бошланиб 1970 йилда ишга тушган бу метрога чет элликлар тушиши қатъий ман қилинган. Хитойликлар эса иш юзасидан метрога тушаётгани ҳақида ишхонасидан берилган маълумотномани кўрсатиши шарт.
Узунлиги бўйича Шанхай метроси биринчи ўринда туради. Узунлиги 500 километр. Ваҳоланки, унинг қурилиши яқиндагина - 1993 йилда бошланган эди.
Энг қиммат метро Швеция пойтахти Стокгольмда - чипта 36 крон туради (тахминан 5,19 доллар). Энг арзон чипта Шимолий Корея пойтахти Пхеньянда. Бу ерда чипта 5 вон (тахминан атиги 0.003579 доллар).
Т.Шомуродов тайёрлади.
