Таржимон хотин-қизлар сафи кенгаймоқда
Самарқанд давлат чет тиллар институтида 12 минг 793 нафар талаба таҳсил олади. Уларнинг 10 минг 594 нафарини хотин-қизлар ташкил этади.
Институтда фаолият олиб бораётган 551 нафар профессор-ўқитувчи бўлса, уларнинг аксарияти, яъни 361 нафари аёллардир. Таълим муассасасида изланишлар олиб бориб, илмий ва бадиий ижод билан шуғулланиб, турли даража ва унвонларга эга бўлаётганларнинг ҳам кўпчилиги хотин-қизлардан иборат.
Жумладан, 37 фан докторининг 18 нафари, 108 нафар (PhD) фалсафа доктори илмий даражасига эга бўлганларнинг 61 нафари, 116 нафар катта ўқитувчининг 76 нафари хотин-қиз.
Кейинги йилларда талабаларимиз орасида ҳам тилни чуқур ўрганиб, халқаро сертификатларга эга бўлаётган, илмий изланишлар олиб бораётган, бадиий ижод, таржимонлик билан шуғулланаётган ёшлар сафи кенгайиб боряпти. Президент стипендияси соҳибаси Ирода Ғаффорова, фаол талабаларимиз Фарангиз Ғаниева, Хосият Жумаева устозлари Мафтуна Қамарова, Шаҳло Шомуродова, Фарида Абдураҳмоновалар кўмагида бадиий ижод ва таржимонлик билан шуғулланяпти. Улар таниқли ўзбек ижодкорларининг қаламига мансуб, қолаверса ўзлари ёзган шеърий ва насрий асарларни инглиз, корейс ва бошқа хорижий тилларга, чет тилларидан эса ўзбек тилига таржима қилмоқда.
Институт профессор-ўқитувчилари ва талабалари томонидан кўплаб катта ва кичик таржима асарлар яратилди. Жумладан, Ойбекнинг “Навоий”, Абдулла Қодирийнинг “Ўткан кунлар” романлари, Зулфия, Абдулла Орипов, Муҳаммад Юсуф ва бошқа атоқли ўзбек шоирларининг асарлари инглиз тилига таржима қилинди.
Бугунги кунда болалар учун ёзилган шеърий ва насрий асарларга эҳтиёж катта. Шу йўналишда ижод қилаётган талабалар Мухлиса Қаюмова ҳамда Ирода Ғаффоровалар болалар учун шеър ва эртаклар ёзиш билан бирга Олқор Дамин, Худойберди Комилов каби шоирларнинг шеърларини инглиз ва корейс тилларига таржима қилишни бошлади.
Бу ижодкор талабаларимиз институтда ўтказиладиган тадбирларда ҳам фаол. Яқинда 8-март - Хотин-қизлар байрами олдидан ўтказилган тадбирда ҳам ўз ижод намуналари билан қатнашди. Бу тадбир атоқли ўзбек шоираси Зулфия таваллудининг 110 йиллиги билан ҳамоҳанг тарзда ўтказилгани айни муддао бўлди. Шоира ҳаёти ва ижодига бағишланган саҳна чиқишлари турли тилларда намойиш этилди.
Ирода Бекназарова,
институт ўқитувчиси.
