Аёллар учун пенсия ёши камайтирилиши мумкин

Бу ҳақидаги лойиҳа жамоатчилик муҳокамасига қўйилди

Ўзбекистонда аёллар учун пенсия ёшини камайтириш бўйича жамоатчилик муҳокамасига тақдим этилган янги лойиҳада 20 йиллик меҳнат стажига эга аёлларга пенсияни эрта тайинлаш ва айрим хизматларни мурожаатсиз кўрсатиш режалаштирилган.

Иқтисодиёт ва молия вазирлиги ишлаб чиққан таклифга кўра, 20 йиллик меҳнат стажига эга аёлларга пенсия умумий ёш чегарасидан 1 йил олдин тайинланиши мумкин.

Лойиҳада 1 июндан бошлаб пенсия таъминоти соҳасидаги айрим хизматларни фуқароларнинг алоҳида мурожаатисиз, проактив шаклда амалга ошириш ҳам назарда тутилган. Жумладан, штат қисқариши, иш ҳажмининг камайиши ёки корхона тугатилиши сабабли ишдан бўшатилиб, ишсиз деб топилган фуқароларга пенсия умумий ёшдан 2 йил олдин тайинланиши режалаштирилмоқда.

Шунингдек, 2027 йил 1 январдан бошлаб Пенсия жамғармаси фуқаролардан қоғоз шаклдаги ҳужжатлар ва маълумотларни қабул қилишни тўхтатиши кўзда тутилган. Бу эса пенсия хизматларини тўлиқ рақамлаштириш жараёнининг бир қисми сифатида баҳоланмоқда.