Бош прокуратура масжидда юз берган қотиллик юзасидан маълумот берди

Ижтимоий тармоқларда Шеробод масжидида қотиллик юз берганлиги ҳақида хабар тарқалди.

Аниқланишича, бугун 22 декабрь куни соат 09:30 ларда Сурхондарё вилояти, Шеробод туманида жойлашган жоме масжиди биноси ичида фуқаро М.Ш. (1974 йилда туғилган, ишсиз) шу масжиднинг котиби Ш.Г. билан ўзаро жанжаллашиб, ўзи билан олиб келган ошхона пичоғи билан унга тан жароҳати етказган.

Бош прокуратура матбуот хизмати раҳбари Ҳаёт Шамсутдиновнинг маълум қилишича, жабрланувчи Ш.Г. олган тан жароҳатлари оқибатида шифохонага олиб кетилаётганида, йўлда вафот этган.

Мазкур ҳолат юзасидан М.Ш.га ЖКнинг 97-моддаси (қасддан одам ўлдириш) 1-қисми билан жиноят иши қўзғатилган ва у процессуал тартибда ушланган.

Тергов ҳаракатлари давом этмоқда.