Булунғурдаги тоннел қурилиши ниҳоясига етмоқда

Яхши биламиз, Булунғур туман марказига боришда шу ҳудуддан ўтган темир йўл туфайли баъзи ноқулайликлар кузатиларди. Яъни, айнан тезюрар поезд ўтиши пайтида шлагбаум туширилиб қўйилар, оқибатда автомобиллар турнақатор йиғилиб, бундай навбатнинг узунлиги бир-икки километрдан ортиқроқ масофага чўзилиб кетарди.

Ушбу муаммонинг ечими сифатида шу ерда автомобиль тоннели қурилиши кераклиги ҳақидаги таклифлар инобатга олиниб, лойиҳа ишлаб чиқилди. Айни пайтда бу масканда ишлар қизғин. 80 миллиард сўмлик лойиҳанинг 65 миллиард сўм миқдордаги ишлари бажариб бўлинди. Демакки, Булунғур туман марказига кириш яқин кунларда муаммога айланмай қолади.

4R-47 - "Булунғур-Ургут" шаҳар автомобиль йўлининг 2-километридан ўтувчи темир йўл билан кесишмасида транспорт тоннелини қуриш ишлари жадал давом этмоқда. Кенглиги 16 метр, икки полосали мазкур автомобиль йўли қурилиши 2024 йилнинг декабрь ойида бошланган эди. Буюртмачи – “Умумий фойдаланишдаги автомобиль йўллари қуриш ва реконструкция қилиш дирекцияси” давлат муассасаси, бош пудратчи - “Ўзйўлкўприк кластерининг Тошкент вилояти филиали” ҳамда ёрдамчи пудратчи “Фаровон йўл сервис” МЧЖлар томонидан амалга оширилаётган ушбу лойиҳа тугалланишига оз вақт қолди.

-Ушбу автомобиль тоннели биринчи навбатда автомобилллар учун катта қулайлик туғдиради, - дейди “Фаровон йўл сервис” МЧЖ иш бошқарувчиси Искандар Мўйинов. – Шунингдек, ушбу лойиҳага кўра, шу тоннел ёнидан пиёдалар ва велосипед йўлаклари қурилиши режалаштирилган. Чунки поезд ўтиш вақтларида бу ерда нафақат ҳайдовчилар, балки пиёдалар ҳам йўлдан ўтолмай анча пайт қолиб кетишларига тўғри келади.

Айни пайтда 70 га яқин ишчи-ходим 30 га яқин техника ёрдамида мазкур тоннел қурилишида хизмат қилмоқда. Жами 539 метрлик мазкур тоннелнинг қурилиши мамлакатимиз мустақиллиги байрами арафасида якунига етиши мўлжалланмоқда.

Гулруҳ МЎМИНОВА.