Nukusdagi festivalda Samarqand paviloni o‘ziga xos tashkil etildi

Nukus shahrida bo‘lib o‘tgan II Xalqaro baxshichilik san’ati festivalida madaniyat va san’at namoyandalari, jamoatchilik vakillari va xorijlik mehmonlar ishtirok etdi. Unda 22 davlatdan 100 dan ortiq baxshi, oqin va jirovlar, badiiy jamoalar qatnashdi. Shuningdek, mamlakatimizning barcha hududidan kelgan ijrochilar o‘z san’atini namoyish etdi.

Mazkur festivalda viloyatimizdan tashrif buyurgan ishtirokchilar uchun ajratilgan hududda vakillarimiz tomonidan tashkil etilgan Tillakori madrasasi, hunarmandlar rastasi, Samarqand nonlari ko‘rgazmasi ishtirokchilar hamda tomoshabinlarga manzur bo‘ldi.

Festivalda viloyatimizdan Shavkat Bobomurodov, Abdualim Bekmurodov, Sayim Ergashev kabi nomdor baxshilar va xonandalar munosib ishtirok etdi. Teatr aktyorlari tomonidan tayyorlangan tarixiy sahna ko‘rinishlari, Amir Temur va Ulug‘bek siymolari, maqom ansamblining diltortar kuy-qo‘shiqlari, milliy an’ana va qadriyatlarimizni namoyish etayotgan “Chavqi” va “Beshqarsak” folklor jamoalarining chiqishlari tomoshabinlarga ko‘tarinki kayfiyat ulashdi.

Yakunda festival doirasida o‘tkazilgan xalqaro tanlov g‘olib va sovrindorlari hamda qatnashchilari munosib taqdirlandi.