Самарқандда уч йилда 6 та замонавий кўприк қурилади
Очиғи, бу эзгу юмушни амалга оширишга аллақачон киришиш лозим эди. Чунки одамларда автомобиллар кўпайгач, шаҳарда йўл тирбандлиги муаммоси келиб чиқди. Оқибатда Самарқанд шаҳрининг гоҳ у, гоҳ бу кўчасида машиналарнинг турнақатор бўлиб тизилиб қолиши, ҳаракат хавфсизлигини таъминлашда ноқулайликлар келиб чиқди.
Самарқанд шаҳрида кўприкларнинг бунёд этилиши эса автоуловларнинг ўтиш имкониятларини бир неча марта оширади, транспорт ҳаракатини тартибга солади. Кўчаларда тирбандликни камайтириб, ҳайдовчи ва йўловчилар ортиқча вақт ва маблағ йўқотишининг олдини олади. Энг муҳими, кўприклар қурилиш натижасида ҳайдовчилар ва одамларнинг узоғи яқин бўлади.
2022 йилда Самарқанд шаҳрида Шанхай Ҳамкорлик Ташкилоти саммити ўтказилиши, ушбу нуфузли тадбирни юқори савияда ташкил этиш учун кейинги уч йилда шаҳар ҳудудида 6 та йўл ўтказгич - кўприк қурилади.
Яъни, Вазирлар Маҳкамасининг 2019 йил 17 майдаги «Самарқанд шаҳрида 2019-2022 йилларда амалга ошириладиган улкан бунёдкорлик ишлари тўғрисида»ги қарорига кўра, Самарқанд шаҳрида 2019-2022 йилларда барпо этиладиган кўприк ва тоннеллар, шунингдек, қуриладиган, таъмирланадиган ва реконструкция қилинадиган автомобиль йўлларининг манзилли рўйхати тасдиқланди. Натижада уч йил ичида лойиҳа қиймати 452,5 миллиард сўм, умумий узунлиги 197 метр бўлган Сиёб канали устидан ўтувчи (37 метр), Гагарин кўчасида темир йўл устидан ўтувчи (10 метр), Қозизода Румий кўчаси бўйлаб 4Р-46 автомобил йўлидан ўтувчи (12 метр), Оқдарё туманидаги собиқ Рофи Ҳамроев номли хўжалик ҳудудини Самарқанд шаҳри маркази билан боғловчи Қорадарё устидан ўтувчи (54 метр) , Ибн Холдун кўчасидаги темир йул устидан ўтувчи (34), Гагарин кўчасидан М-37 автомобиль йўлига чиқиш учун Сиёб канали устидан ўтувчи (50 метр) кўприклар қурилади.
Қурилиш ишлари республика бюджети маблағлари ҳамда "Абу-Даби тараққиёт жамғармаси" маблағлари ҳисобидан амалга оширилади.
