Mirumar Asadov Samarqand yog‘och o‘ymakorligi maktabining yorqin vakili
O‘zbekiston Qahramoni Mirumar Asadov hayot bo‘lganida bugun 95 yoshni qarshilagan bo‘lardi.
M.Asadov 1927 yil 7 sentyabrda Samarqand shahrida tug‘ilgan.
1939 yilda shaharda milliy hunarmandchilik maktabining ochilishi uning kelajak taqdirini belgilab qo‘ydi. Shuningdek, Ikkinchi jahon urushi boshlanishi bilan Samarqandga Moskvadan badiiy institut ko‘chirib o‘tkazilgan. Mirumar Asadovning shaxsiy xotiralariga ko‘ra, u moskvalik mutaxassislardan chizmachilik va rassomlikdan, buxorolik mashhur usta Shirin Murodovdan yog‘och o‘ymakorligi bo‘yicha bilim va tajriba olgan.
Dastlab TOshkent shahridagi Alisher Navoiy nomidagi opera va balet hamda Muqimiy nomidagi teatrlar san’at saroylarini ganch va yog‘och o‘ymakorligi, koshin bezaklari bilan bezatilishida ishtirok etadi.
Mustaqillik yillarida usta ter to‘kkan birinchi ahamiyatli ob’yekt – Buxoro viloyatidagi Bahovuddin Naqshbandiy maqbarasi bo‘ldi. Deyarli vayron qilingan va o‘zining tarixiy qiyofasini yo‘qotgan maqbara hukumatning maxsus qaroriga muvofiq ta’mirlanadi. Bugun ushbu maqbara nafaqat dong‘i ketgan ma’naviy markaz, balki sharq me’morchiligining betakror mohiyatini o‘zida jam etgan nozik me’moriy namunaga aylangan. Bunda samarqandlik usta Mirumar Asadovning ham hissasi bor.
Ushbu ob’yektdagi yorqin ishidan so‘ng Mirumar Asadov, deyarli barcha muhim qadimiy yodgorliklarda xizmat qilib, ularning barchasi hukumat nazoratida tiklangan. Ganch, koshin, toshga o‘yish ustasi sifatida uning iqtidori Imom Buxoriy maqbarasi, Registon me’moriy majmuasi, Bibixonim masjidi, Amir Temur maqbarasi, Shohi Zinda memorial majmuasi, Hazrati Hizr masjidi kabi ob’yektlarda gavdalangan. Mazkur ma’naviy madaniyat va me’moriy yodgorliklarni tiklashda o‘z hissasini qo‘shganligi uchun 1996 yilda Mirumar Asadovga yuksak unvon - O‘zbekiston Qahramoni berilgan.
Bugungi kunda Samarqandda M.Asadovning yuzlab shogirdlari bor. Ular yog‘och o‘ymakorligi bo‘yicha nafaqat yurtimizda, balki xorij davlatlarida nom qozongan.
Mirumar Asadov 2010 yilda vafot etgan.
