Onlayn nazorat-kassa mashinasi qanday ishlatiladi?
- Tashkilotimiz tomonidan olingan onlayn nazorat-kassa mashinasi bir haftadan beri ishlamayapti. Onlayn NKMni olgan joyimizga berdik. Ular onlayn NKMni qayta dasturlatish uchun Toshkentga yubormoqchi. Ushbu davrda onlayn NKMdan foydalanmasligim to‘g‘rimi?
G.Xonnazarova.
- Vazirlar Mahkamasining 2019 yil 23 noyabrda qabul qilingan qaror bilan tasdiqlangan “Aholi bilan pulli hisob-kitoblarni amalga oshirishda onlayn nazorat-kassa mashinalari va virtual kassa tizimini qo‘llash tartibi to‘g‘risida”gi nizomiga asosan onlayn NKM va virtual kassaga kafolatli uzluksiz texnik xizmat ko‘rsatish texnik xizmat ko‘rsatish markazi bilan tadbirkorlik sub’yekti o‘rtasida tuzilgan shartnoma asosida amalga oshiriladi.
Onlayn NKM yoki virtual kassa nosoz bo‘lgan taqdirda tadbirkorlik sub’yekti bu haqda texnik xizmat ko‘rsatish markazining Sall-markaziga qo‘ng‘iroq qilib, xabardor qilishi kerak. Shuningdek, buni bevosita tashrif buyurib amalga oshirishi ham mumkin.
Texnik xizmat ko‘rsatish markazi ma’lumotlar tushgan vaqtdan boshlab 1 soat ichida turg‘un savdo (xizmat ko‘rsatish) shoxobchasi joylashgan manzil bo‘yicha soliq organini maxsus axborot tizimi orqali xabardor qiladi.
Texnik xizmat ko‘rsatish markazi ta’mirlash davrida sizga 1 kun ichida zaxiradagi onlayn NKM yoki virtual kassasini o‘rnatib beradi. Bu paytga qadar tadbirkorlik sub’yekti xaridorlar bilan hisob-kitoblarni davlat soliq xizmati organlarida ro‘yxatdan o‘tkazilgan maxsus kvitansiya daftari asosida amalga oshiradi.
Savolga viloyat davlat soliq boshqarmasi bo‘lim boshlig‘i Bekzod Saliyev javob berdi.
