“Samarqand ruhi rassom nigohida”

Samarqand shahridagi “Chorsu” galereyasida O‘zbekiston Badiiy akademiyasi akademigi Asliddin Isayevning shu nomdagi ko‘rgazmasi ochildi.

Shanxay Hamkorlik Tashkiloti sammiti oldidan tashkil etilgan mazkur ko‘rgazmada rassomlar, tasviriy san’at ixlosmandlari, sayyohlar hamda keng jamoatchilik vakillari ishtirok etdi.

Ko‘rgazmada rassomning 60 dan ziyod ijod namunalari o‘rin olgan. Bu asarlar kishini fikrlashga chorlaydi. Ularda falsafiy qarashlarni, beg‘uborlik va nafosatni ko‘rish mumkin. Jumladan, “To‘yga pishirilgan nonlar”, “Izvoshchi”, “To‘y”, “Kutilmagan nur”, “Kolxozdagi oqshom”, “Kuz”, “Qovun bozori” kabi asarlar xalqimizning milliy qadriyati va an’analarini aks ettiradi.

– Asliddin Isayev o‘ziga xos uslub va ruhiy ta’siriga ega ijodkorlardan biri, – deydi Badiiy ijodkorlar uyushmasi viloyat bo‘limi raisi Nuriddin Kalonov. – Asarlarida bolalikdan unga yaqin odamlar, O‘zbekistonning go‘zalligi, tarixi tasvirlangan. Qadimiy va hamisha navqiron Samarqand, uning maftunkor manzaralari ijodkorga ilhom manbai bo‘lib xizmat qiladi.

Yaqinda Samarqandga ShHT sammiti o‘tkazilishi munosabati bilan a’zo davlatlarning tajribali rassomlari keldi. Ular ko‘hna kent aks ettirilgan eng sara asarlari bilan sammit arafasida ochiladigan xalqaro ko‘rgazmada ishtirok etadi. Bugungi ko‘rgazmadan maqsad ham Samarqand ruhini yanada yorqinroq namoyish etishdan iborat.

Baxtiyor MUSTANOV.