Илтимос, дадамнинг бошлиқлари, дадамга барвақтроқ жавоб беринг!
Салом, менинг меҳрибон дадажоним! Яхши ишлаб юрибсизми?
Мени кечиринг, кеча ҳам сизни кўраман, деб кутиб-кутиб ухлаб қолибман. Лекин ухлаган бўлсам ҳам мени эркалаганингизни, суйиб ўпиб қўйганингизни ҳис қиламан.
Биламан, бизни боқиш учун, уйғонмасимиздан ишга кетиб, ухлаганимизда қайтасиз. Сизни охирги марта бир ой илгари кўрган эканман. Ўшанда сиз билан маза қилиб ўйнаганим эсимда. Яна шундай ишдан барвақт қайтишингизни ҳар куни интиқиб кутаман.
Мен Президент бобомларни яхши кўраман. Президент бобомлар сизга ишдан барвақт қайтишингизни айтган эканлар. Нимага айтганларини қилмаяпсиз?!
Ойим айтадилар, агар сиз кечгача ишламасангиз, ишдан ҳайдашлари мумкин экан. Сизни ишдан ҳайдашса, қишлоққа қайтиб кетишимизга тўғри келар экан. Кейин сиз ишламасангиз, оч қолар эканмиз. Ҳозирги кунда тирикчилик жуда қийин экан. Дадажон, қишлоқдаги уйимизда яшасак ҳам, майли, фақат сизни кўриб турсам бўлди!
Ўқитувчимиз одобим учун икки баҳо қўйди. Ойимга айтишича, менга ота тарбияси етишмаётган экан.
Бугун ойимга йиғлаб бердим, “дадам бизни ёмон кўради” деб. Ойим айтдиларки, сиз бизни жуда ҳам яхши кўраркансиз, сиз ҳам биз билан бирга бўлишни хоҳларкансиз. Лекин бошлиқларингиз рухсат беришмас экан.
Илтимос, дадамнинг бошлиқлари, дадамга барвақтроқ жавоб беринг!
Илтимос, дадажон, уйга барвақтроқ келинг! Сизни жуда ҳам соғиндик.
Акобир ШАМСИЕВ.
