Каттақўрғонда чорвачилик ривожланади...ми?

Тумандаги “Алишер Лидер файз” хусусий корхонасида ташкил этилган кўргазмали ўқув-семинарда шу саволга жавоб изланди. Унда чорвачиликни ривожлантириш, соҳага наслдор қорамоллар олиб кириш, уларни замонавий технологиялар асосида парваришлаш масаласи кун мавзусига айланди.

“Ўзбекчорванасл” агентлиги раҳбар ва мутахассислари, тумандаги муқобил МТП  раислари, чорвачилик йўналишида фаолият юритаётган фермерлар ҳамда соҳага алоқадор ташкилот раҳбарлари иштирок этган семинарда дастлаб туман ҳокими А.Баҳромов Каттақўрғонда чорвачиликни ривожлантириш, тармоққа четдан зотдор қорамолларни киритиш, бунинг учун сармоя ажратиш бўйича сўз юритди.

Сўнгра семинар иштирокчилари “Алишер Лидер файз” хусусий корхонаси томонидан 2018 йил октябрь ойида Германия ва Австрия давлатларидан келтирилган 63 бош «Голштейн» ҳамда «Сментал» наслли қорамол ҳамда 59 бош наслли бузоқларни парваришлаш, уларнинг маҳсулдорлиги, самараси ҳақида маълумотга эга бўлишди. 

Шунингдек, ҳудудда чорва мол бош сонини идентификациялаш, мавжуд қорамолларни сунъий уруғлантириш, қишлоқ хўжалиги озуқа экинларини селекциялаш, такрорий экин сифатида маккажўхори етиштиришда томчилатиб суғоришни ташкил этиш бўйича ўзаро фикрлашишди, тажриба алмашишди.

Жаҳонгир Сафаров.