Оқдарёлик фуқаро ноқонуний қурилган бино ва деворини ўз ҳисобидан бузадиган бўлди

Жорий йилнинг 28 февраль куни ижтимоий тармоқларда ноқонуний қурилган қурилмани бузиш ҳолатлари акс этган видеолавҳа жойлаштирилди.

Аниқланишича, фуқаролик ишлари бўйича Пайариқ туманлараро судининг 2019 йил 24 октябрдаги ижро варақасига асосан қарздор Файзиев Феруз Махманазарович томонидан Оқдарё тумани, Лойиш шаҳарчаси, Янгиобод кўчасидаги ноқонуний равишда эгаллаб олинган 0,12 гектар ер майдонидаги ўзбошимчалик билан қурилган 16 метр квадратдан иборат бино ва 25 метр узунликдаги деворни қарздор ҳисобидан бузиш ва ер майдонини аввалги ҳолатига қайтариш тўғрисидаги ижро ҳужжати 2020 йил 11 январда Бюронинг Оқдарё тумани бўлими иш юритувига келиб тушган.

Қарздор Ф.Файзиев ушбу ижро ҳужжати бўйича қурилган ноқонуний бино ва деворни ўзининг ҳисобидан бузиш, ер майдонини аввалги ҳолатига қайтариш тўғрисида бўлим давлат ижрочилари томонидан бир неча маротаба огоҳлантирилган бўлишига қарамасдан, қарздор ижро ҳужжатининг ижросини ихтиёрий равишда бажармасдан келган.

Шу сабабли 2020 йил 26 февралда тегишли тартибда туман ҳокимлиги, ИИБ, ер ресурслари ва давлат кадастр бўлими, тиббиёт бирлашмаси, ёнғин хавфсизлиги бўлими ходимлари иштирокида мажбурий ижро ҳаракатларини амалга ошириш давомида қарздор Ф.Файзиевнинг оила аъзолари ва яқин қариндошлари томонидан тўсқинлик қилинганлиги сабабли ижро ҳаракатлари қисман амалга оширилган ва қарздор Ф.Файзиев томонидан ушбу ноқонуний қурилган бинонинг бузилмай қолган қисмини ихтиёрий равишда ўз ҳисобидан бузишини билдирганлиги сабабли ижро ҳаракатлари бошқа кунга қолдирилган.

Ижро ҳаракати давомида давлат ижрочиларига нисбатан жавобгар ҳамда унинг қариндошлари томонидан ноқонуний ҳолатлар содир этилмаган.

Мажбурий ижро бюроси Cамарқанд вилояти бошқармаси.