Бугун Оқ уйда Зеленский ва энг кўп Европа етакчилари учрашадиган кун
Украина президенти Владимир Зеленский Вашингтонга етиб борди. Бугун у ерда АҚШ президенти Дональд Трамп билан учрашуви бўлиб ўтади.
Учрашувда Европа етакчилари ҳам иштирок этади.
Зеленский Трампга таклифи учун миннатдорлик билдирди ва урушни имкон қадар тезроқ тугатиш истагини таъкидлади. Унинг сўзларига кўра, биринчи навбатда буни Россия қилиши керак. «Россия ўзи бошлаган бу урушига нуқта қўйиши керак. Ва мен умид қиламанки, Америка ҳамда Европа дўстларимиз билан биргаликдаги кучимиз Россияни ҳақиқий тинчликка мажбур қилади», деди Украина етакчиси.
Трамп эса Зеленский Қримдан воз кечиб, НАТОга кирмасликка рози бўлса, урушни тўхтатиши мумкин, дея таъкидлайди. «Украина президенти Зеленский, агар хоҳласа, Россия билан урушга деярли дарҳол барҳам бериши ёки курашни давом эттириши мумкин.
Қандай бошланганини эслаб кўринг. Обама Қримни 12 йил олдин (бирорта ҳам отишмасиз!) бериб юборгани каби (Қрим 2014 йилда АҚШнинг ўша пайтдаги президенти Барак Обама даврида Россияга “берилган”) - Қримни қайтариш йўқ ва Украинанинг НАТОга кириши йўқ! Айрим нарсалар ҳеч қачон ўзгармайди!», деб ёзди у ўзининг Truth Social тармоғида Зеленскийнинг Оқ уйга ташрифи арафасида.
Бугун Зеленскийни Вашингтонда Британия, Италия, Германия, Франция ва Финландия етакчилари, шунингдек НАТО Бош котиби ва Европа комиссияси раҳбари ҳамроҳлик қилади. Трамп бунча кўп Европа етакчилари ҳеч қачон бир вақтнинг ўзида тўпланмаганини қайд этади.
CNN таъкидлашича, Трампнинг баёноти Зеленский Оқ уйдаги учрашувда дуч келадиган босимни акс эттиради. «У айтган икки шарт — Украина 2014 йилда Россия томонидан ноқонуний аннексия қилинган Қримдан воз кечиши ва НАТОга ҳеч қачон қўшилмасликка рози бўлиши — Путин урушни тўхтатиш учун қўйган талаблари қаторига киради», деб ёзади телеканал.
Эслатиб ўтамиз: 15 август куни АҚШ президенти Дональд Трамп ва Россия президенти Владимир Путин Аляскада Россия – Украина урушига барҳам бериш йўлларини муҳокама қилиш учун учрашдилар. Учрашув якунида ҳеч қандай мажбурият акс эттирувчи қарор қабул қилинмади, ҳатто ўт очишни тўхтатиш ҳақида ҳам келишув бўлмади.
Европа сиёсатчилари ушбу учрашувни изоҳлар экан, асосан дипломатик тарзда Трампнинг тинчликпарварлик ҳаракатларини олқишлашди, аммо Путинга ишонишдан бош тортдилар. АҚШда Демократик партия вакиллари республикачи Трампни амалда Путин томонини олганликда айблайди. Россиялик сиёсатчилар эса учрашувдан жуда мамнун бўлди.
АҚШ президенти Дональд Трамп 22 август куни Владимир Путин ва Владимир Зеленский билан уч томонлама учрашув ўтказишни режалаштирмоқда, деб хабар берди Axios. Америка президенти бу санани Владимир Путин билан музокарадан сўнг Европа етакчилари ва Украина президенти билан суҳбат чоғида айтган.
Дарвоқе, бугун, яъни Зеленский ва Трамп музокаралари ўтказиладиган кун Россия Украинага йирик ҳужумларни амалга оширди. Харьковда етти нафар, Запорожьеда уч нафар одам, жумладан бир бола ҳалок бўлган.
