Исроил ва Ливан ўт очишни тўхтатиш бўйича келишувга эришди

Бу ҳақда АҚШ Давлат департаменти хабар қилди. Келишув 2–3 июнь кунлари АҚШ, Исроил ва Ливан давлатлари ўртасида бўлиб ўтган уч томонлама музокаралар натижаси бўлди.

Келишув шартларига кўра, Эрон қўллаб-қувватлайдиган «Ҳизбуллоҳ» гуруҳи ўт очишни тўхтатиши ва Ливан жанубидаги ҳудудларни — мамлакат чегарасидан Литани дарёсигача бўлган минтақани тарк этиши лозим.
Қўшма баёнотда, шунингдек, «Исроил ва Ливан ўртасидаги муносабатларнинг келажаги икки мамлакатнинг суверен ҳукуматлари томонидан ҳал қилиниши керак»лиги таъкидланган.
Исроил ва Ливан бир-бирига нисбатан «душманлик нияти йўқлиги»ни ҳам тасдиқлаб, тўғридан-тўғри музокараларни давом эттириш мажбуриятини олди. Томонлар ушбу музокараларни 22 июнда бошланадиган ҳафта давомида бошлаши керак.

Май ойи охирида Исроил Ливандаги қуруқликдаги ҳарбий амалиётни кенгайтириб, Байрутнинг жанубий атрофларига, жумладан «Ҳизбуллоҳ»нинг асосий таянч нуқтаси ҳисобланган Даҳия туманига зарбалар берган эди. Бу қарор «Ҳизбуллоҳ» Исроилнинг шимолий ҳудудларига ҳужумларни кучайтирганидан кейин қабул қилингани айтилган.
Июнь ойи бошида Эрон оммавий ахборот воситалари Исроилнинг Ливанга берган зарбалари туфайли Теҳрон АҚШ билан урушни тўхтатиш бўйича музокараларни тўхтатганини хабар қилди.