Каттақўрғонлик аълочи битирувчиларга олтин медаллар топширилди
2019-2020 ўқув йилида Каттақўрғон тумани халқ таълими бўлими тасарруфидаги умумтаълим мактабларининг 9-синфини 4160 нафар ва 11-синфини 3894 нафар ўқувчи тамомлади. Шундан аъло баҳоларга ўқиган 107 нафар 9-синф битирувчилари аъло даражадаги шаҳодатномалар олишга муваффақ бўлди. 11-синф битирувчиларидан 16 нафари олтин медаль соҳибига айланди.
Туман мактабларини имтиёзли битирган ўқувчиларни тақдирлаш маросими бўлиб ўтди. 17-умумтаълим мактабида ўтган тадбирда туман ҳокими Аъзамхон Баҳромов иштирок этиб, имтиёзли равишда битирган ўқувчиларга олтин медалларни тантанали топширди. 1, 35 ва 96-умумтаълим мактабларида ҳам сектор раҳбарлари аъло баҳоларга ўқиган битирувчиларни тақдирлашди.
Медалларни топшириш тадбирларида аълочи ўқувчиларнинг ота-оналари, ўқитувчиларига ташаккурномалар топширилди.
