Самарқанддан сайланган депутат Марказий банкдан кредит пеняси, жарима ва фоизларни адолатли тартибга солишни талаб қилди
Кейинги йилларда мамлакатимизда Марказий банк томонидан монетар сиёсатни такомиллаштириш, молиявий барқарорликни таъминлаш ҳамда банк тизимида ошкораликни кучайтиришга қаратилган изчил ислоҳотлар амалга оширилмоқда. Ушбу чора-тадбирлар тадбиркорлик субъектлари ва аҳоли учун молиявий хизматлардан фойдаланиш имкониятларини кенгайтиришга хизмат қилмоқда.
Аммо айрим тижорат банклари томонидан кредит тўловлари кечиктирилган ҳолларда қўлланилаётган юқори пеня, оширилган фоиз ставкалари ва қўшимча жарималар адолат ва мутаносиблик тамойилларига зид экани бўйича жамоатчилик ва тадбиркорлар ўртасида ҳақли эътирозлар кузатилмоқда. Бундай амалиётлар, айниқса, кичик бизнес ва оилавий тадбиркорлик субъектларининг молиявий барқарорлигига салбий таъсир кўрсатаяпти.
Қонунчилик палатаси депутати, O‘zLiDeP фракцияси аъзоси Диёр Ҳусанов айнан шу ҳолатларни инобатга олган ҳолда Ўзбекистон Республикаси Марказий банки раиси Тимур Ишметовга депутатлик сўрови юборди. Сўровда тадбиркорлар ва аҳоли ўртасида келиб тушаётган мурожаатлар, шунингдек, банк амалиётида кузатилаётган муаммоли жиҳатлар алоҳида қайд этилган.
Хусусан, депутат кечиктирилган тўловлар учун қўлланилаётган санкцияларнинг молиявий юкламасини камайтириш бўйича Марказий банк томонидан қандай чоралар кўрилаётгани, пеня, фоиз ва жарималарни адолатли ҳамда мутаносиб қўллашга қаратилган қонунчилик ташаббуслари юзасидан аниқ ва асослантирилган тушунтириш беришни сўраган.
