Рейтинг: энг кўп сотиладиган автомобиль брендлари
Глобал автомобиль бозори ўзгаришда давом этмоқда, чунки электромобиль ишлаб чиқарувчи компанияларининг жадал ўсиб бориши шароитида анъанавий ишлаб чиқарувчилар ўз позициялари барқарорлигини сақлаб қолиш учун курашмоқда.
2025 йилнинг биринчи ярмида Toyota бошқа ишлаб чиқарувчилардан катта фарқ билан ўзининг яққол етакчилигини қайтадан исботлаб берди. Шу билан бирга бошқа осиёлик ишлаб чиқарувчилар кучли 15 таликдаги ўз ўрнини сақлаб қолди. Янги инфографикада ҳар бир бренднинг савдо ҳажми ва йиллик ўсиш суръатлари таққосланган кўрсаткичлар акс эттирилган.
Диққатга сазовор тенденциялардан бири биринчи навбатда, маҳаллий ва халқаро миқёсда фаол равишда кенгайиб бораётган хитойлик BYD ва Geely ишлаб чиқарувчиларнинг мустаҳкамланиши бўлди. Бундай ўсиш пасайиб кетган бир қатор анъанавий Европа ва япон брендлари кўрсаткичларидан кескин фарқ қилади.
Инфографика маълумотларини расмий автомобиль ишлаб чиқарувчилар ҳисоботлари ва жаҳон енгил автомобиллар бозори тахминларидан фойдаланган саноат таҳлилчиси Фелипе Муньос тақдим этди. Статистикага ҳам ички ёнув двигателли, ҳам электр транспорт воситалари киради.
Йиллик ўсиш суръати 31 фоизни ташкил этган BYD икки миллиондан ортиқ автомобиль сотиб, дунё миқёсида тўртинчи ўринни эгаллади. Экспертлар бу суръатда BYD 2025 йилнинг охиригача Fordни ортда қолдириши мумкинлиги ҳақида тахмин қилишмоқда.
Бир қатор таниқли брендлар, жумладан, Honda, Nissan, Mercedes ва Audi автомобиллари савдоларнинг пасайиши кузатилди. Европа премиум брендлари ҳам асосий бозорларда талабнинг заифлашиши фонида бозор улушини йўқотди. Шу билан бирга, Hyundai, Kia ва Chevrolet автобозорида ўртача ўсиш кузатилди.
Toyota 2025 йилнинг биринчи ярмида кўпчилик рақобатчиларга қараганда икки баробар кўп, яъни 4,73 миллион дона автомобиль сотди. Бу ўтган йилнинг шу даврига нисбатан 6 фоизга ўсишни англатади ва компаниянинг Шимолий Америкадан Осиёгача бўлган бозорларда эгаллаб турган мустаҳкам ўрнини тасдиқлайди.
Электрлаштириш давом этаётганига қарамай, Toyotaнинг ишлаб чиқариш кўлами соҳада етакчиликни сақлаб қолиш имконини бермоқда.
Б.Муҳаммадиева тайёрлади.
