Самарқандликлар “CACIE 2025” халқаро таълим конференциясида қатнашмоқда
Шу кунларда Хитойнинг Пекин шаҳрида “CACIE 2025” халқаро таълим конференцияси ўтказилмоқда.
Анжуман Хитой Таълим вазирлиги томонидан ташкил этилган бўлиб, унда дунёнинг кўплаб мамлакатларидан касбий таълим ва техник соҳа раҳбарлари, экспертлар ҳамда саноат вакиллари қатнашмоқда.
Тадбирда Ўзбекистон вакиллари ҳам иштирок этмоқда. Улар CIIC International Education ва Weican Vocational Education каби нуфузли ташкилотларнинг халқаро платформалари билан танишиб, “Belt and Road International TVET Standard and Resource Project” лойиҳаларининг амалий натижалари билан яқиндан танишмоқда. Ушбу ташаббуслар Хитойнинг 40 дан ортиқ давлатлар билан ҳамкорлигида амалга оширилаётган, халқаро касбий таълимни ривожлантиришга қаратилган глобал дастурларни ўз ичига олади.
Ўзбекистон делегациясининг ушбу конференциядаги иштирокида касбий таълим тизимини халқаро стандартларга интеграция қилиш, Хитойнинг илғор ўқув моделларини ўрганиш ва “Бир макон – бир йўл” ташаббуси доирасида янги ҳамкорлик лойиҳаларини йўлга қўйишни мақсад қилган.
Шунингдек, Ўзбекистон-Хитой қўшма ўқув марказларини ташкил қилиш, халқаро сертификатлаш дастурларини жорий этиш, 3+1 ўқув модели асосида халқаро дипломга эга мутахассислар тайёрлаш, техник мутахассисларни халқаро малака ошириш дастурларига жалб этиш, “WorldSkills Asia” доирасидаги ҳамкорликни кенгайтириш, коллеж ва техникумларга замонавий техник база - VR/AR лабораториялари ва саноат жиҳозларини етказиб беришни кўзламоқда.
Эътиборлиси, CIIC International Education томонидан тақдим этилган “International TVET Service Manual 2026” ҳужжатида Ўзбекистон ҳам “Belt and Road Education Community” доирасидаги устувор ҳамкор давлат сифатида қайд этилган. Ушбу тизим орқали Ўзбекистон касбий таълим тизими халқаро ресурслар, ўқитувчи алмашинуви, қўшма дастурлар ва сертификатлаш тизимларига уланади.
Натижада Ўзбекистоннинг “CACIE 2025”даги иштироки мамлакатимиз касбий таълим тизимини халқаро даражага олиб чиқиш йўлидаги муҳим қадам бўлади. Бу нафақат техник базани модернизация қилиш, балки халқаро тан олинган мутахассислар тайёрлаш, янги технологияларни ўқув жараёнларига жорий этиш ва “Made in Uzbekistan Skills” брендини глобал миқёсда тарғиб этиш учун кенг имконият яратади.
