Афғон уруши қатнашчилари Самарқандда жам бўлди
Самарқанд шаҳрида Россия Федерациясининг Ўзбекистондаги элчихонаси ҳамда Ўзбекистон “Ветеран” жангчи фахрий ва ногиронлари бирлашмаси ҳамкорлигида Афғон уруши қатнашчиларига бир марталик инсонпарварлик ёрдами акцияси бўлиб ўтди.
Сурхондарё, Қашқадарё ва Жиззах вилоятларидан келган ҳамда самарқанданлик 120 нафар афғон уруши қатнашчиси “Мотамсаро она” ҳайкали пойига гул қўйди.
Тадбир “Боғишамол” базмгоҳида бир пиёла чой устида давом этди. Унда қуролдош дўстлар бир-бирлари билан дийдорлашди, дилдан суҳбат қуришди.
Россия Федерациясининг Ўзбекистондаги элчихонаси ҳарбий атташе катта ёрдамчиси, полковник А.Машуков, Ўзбекистон “Ветеран” жангчи фахрий ва ногиронлари бирлашмаси раҳбари Т.Муродов Россия Федерацияси томонидан афғон уруши қатнашчилари ва урушда ҳалок бўлганларнинг яқинларига 200 АҚШ долларига тенг бир марталик инсонпарварлик ёрдами тарқатди.
- Биринчи марта ташкил этилган минтақавий учрашув тадбирида кўп вақтдан буён кўрмаган қуролдош дўстларимизни кўрдик, - дейди Сурхондарё вилоятининг Ангор туманидан келган Алимардон Бобониёзов. – 1979-1980 йилда Афғонистонда бўлиб қайтгач, ҳудудимиздаги ҳарбий автоколоннада 43 йил ҳайдовчи бўлиб ишладим ва пенсияга чиқдим. Бугунги учрашувда биз ўша даврдаги мудҳиш ҳолат ва ҳалок бўлган дўстларимизни хотирладик.
Тадбирда Самарқанд шаҳрининг Сўзангарон маҳалласида туғилган ва афғон урушида ҳалок бўлган Аъзам Тўхтаев ёдга олиниб, унинг жасорати учун онаси Кимё Тўхтаевага ташаккур билдирилди ва бир марталик пул мукофот берилди.
Ҳусан Элтоев.
