АҚШ ва Исроил Оятуллоҳ Хоманаийнинг жойлашувини қандай аниқлади?
Маълум қилинишича, Эрон олий раҳбари Али Хоманаий ҳалок бўлган ҳужум одатдагидек тун эмас, балки тонгда амалга оширилган. Бунга АҚШ ва Исроил томонидан ҳужумдан бир неча соат олдин қўлга киритилган муҳим разведка маълумотлари сабаб бўлган.
Икки давлат бир неча ой давомида юқори лавозимли эронлик амалдорлар бир жойга тўпланиши мумкин бўлган пайтни кутган. Разведка маълумотларига кўра, Хоманаий шанба куни эрталаб Теҳрон марказидаги бинолар мажмуасида бўлиши аниқланган. Шу вақтда у ерда бошқа юқори лавозимли ҳарбийлар ва разведка вакиллари ҳам йиғилиш ўтказаётгани маълум бўлган.
Дональд Трамп ижтимоий тармоқдаги баёнотида Хоманаий замонавий кузатув тизимларидан қочиб қутула олмаганини айтди. Унинг жойлашуви агент орқали ёки бошқа амалдорларнинг ҳаракатларини юқори технологиялар ёрдамида кузатиш орқали аниқланган бўлиши мумкин.
Ўтган йил июндаги 12 кунлик уруш давомида ҳам Исроил Эрон ядровий дастури билан боғлиқ шахсларни нишонга олган ва телекоммуникация ҳамда мобил алоқаларни бузиш орқали айрим шахсларнинг ҳаракатларини кузатгани хабар қилинган. Бу усуллар вақт ўтиши билан раҳбарнинг кундалик ҳаракатлари бўйича маълум «намуналар»ни шакллантиришга имкон берган.
The New York Times ёзишича, бу сафар разведка маълумотлари «ЦРУ» томонидан тақдим этилган. Аммо тўғридан-тўғри зарбани Исроил амалга оширган. Маълумотлар олий раҳбар ва бошқа амалдорларнинг ҳаракатлари ҳақида олдиндан огоҳлантиргани учун узоқ масофага ракета учира оладиган қирувчи самолётлар жалб этилган.
Хабарларга кўра, маҳаллий вақт билан тахминан соат 9:40 да мажмуага 30 та кучли бомба ташланган. Ҳужум пайтида Мар-а-Лаго қароргоҳида тун бўлиб, у ерда Трамп ва расмийлар вазиятни кузатиб турган.
Эрон расмийлари уч нафар юқори лавозимли амалдор, жумладан мудофаа вазирлиги вакиллари ҳалок бўлганини тасдиқлади.
Таажжубланарлиси, АҚШ президенти Дональд Трамп давом этаётган дипломатик музокаралар якунланмасидан туриб ҳарбий амалиётни бошлади. Танқидчилар бу қадам вазиятни янада кескинлаштириши мумкинлигини айтмоқда. АҚШ ва Эрон ўртасидаги сўнгги музокаралар 2026 йил февраль ойи бошида Уммон пойтахти Масқатда бўлган. Кейинги учрашув ой охирида Женевада давом этган.
