АҚШда коронавирус инфекциясига чалинганлар сони уч миллиондан ошди
АҚШда коронавирус инфекциясига чалинганлар сони 3 097 084 нафарга етди. Сўнгги кеча-кундузда 56 251 нафар касалланиш ҳолати қайд этилган. Бу ҳақда 8 июль куни Reuters агентлиги хабар берди.
Мамлакатда COVID-19 инфекциясидан вафот этганлар сони 131 минг нафардан ошиб кетди. Сўнгги кеча-кундузда 923 нафар ўлим ҳолати қайд этилди.
Калифорния, Гавайи, Айдахо, Миссури, Монтана, Оклахома ва Техас штатларида бир кеча-кундузлик рекорд натижа қайд этилган. Техас ва Калифорнияда сўнгги кеча-кундузда 10 мингдан ортиқ коронавирус ҳолати аниқланган. Аризона штатида таҳлил топширганларнинг 26 фоизи COVID-19 билан касалланган. Жами 24 штат кейинги бир хафтада “касаллик юқишининг ўта юқори даражаси” қайд этилаётганлиги тўғрисида маълум қилди.
