Буғдой навларини яратган олим Давлат мукофоти билан тақдирланди
Самарқанд агроинновациялар ва тадқиқотлар институти агробиология факультети декани, қишлоқ хўжалиги фанлари доктори Ғулом Ғайбуллаев 25 йилдан буён мамлакатимиз қишлоқ хўжалиги тизими учун малакали кадрларни тайёрлаш, соҳага илмий-техникавий янгиликларни жорий этиш ишларига муносиб ҳисса қўшиб келмоқда.
Олим 2009-2024 йиллар давомида “Жасмина”, “Фарбома”, “Амира” каби сифатли ва қимматли буғдой навларини яратди ва ушбу навларга учта патент олди. Кейинги йилларда кузги юмшоқ буғдойнинг “Ўзбекистон 30” ва “Самарқанд”, арпанинг “Бек” навларини яратди, ушбу навлар республика Давлат нав синаш марказида синалмоқда.
Ғулом Ғайбуллаев селекция ва уруғчилик ҳамда ўсимликшунослик ихтисослиги бўйича 2017 йил қишлоқ хўжалик фанлари фалсафа доктори, 2019 йил селекция ва уруғчилик ихтисослигида қишлоқ хўжалиги фанлари доктори илмий даражасига эга бўлди.
Тадқиқот натижалари асосида яратилган кузги юмшоқ буғдойнинг “Жасмина”, “Фарбома” ҳамда арпанинг “Бек” навлари республикамиз ва вилоятда ҳар йили 15 минг гектар майдонда кенг экилиб келинмоқда. Шунингдек, ғаллачиликка ихтисослашган фермер хўжаликлари, кластерлар билан ҳамкорлик қилиб, ўз амалий ёрдамларини кўрсатиб, билим ва амалий малакасини ошириб келмоқда.
Ғ.Ғайбуллаев 2 та ўқув услубий қўлланма, 2 та ўқув қўлланма, 1 та дарслик, 3 та услубий тавсиянома ва амалий тавсиялар муаллифи.
Шунингдек, у олий таълим тизимидаги илмий кенгаш аъзоси сифатида ўқув фанларининг янги стандартларини яратиш, намунавий ўқув режалари ва дастурларини ишлаб чиқишда фаол иштирок этмоқда.
Илм-фан соҳаси ривожига қўшган ҳиссаси учун Ғулом Ғайбуллаев Республика Президентининг Фармонига кўра “Шуҳрат” медали билан тақдирланди.
Хуршида ЭРНАЗАРОВА.
