Bug‘doy navlarini yaratgan olim Davlat mukofoti bilan taqdirlandi
Samarqand agroinnovatsiyalar va tadqiqotlar instituti agrobiologiya fakulteti dekani, qishloq xo‘jaligi fanlari doktori G‘ulom G‘aybullayev 25 yildan buyon mamlakatimiz qishloq xo‘jaligi tizimi uchun malakali kadrlarni tayyorlash, sohaga ilmiy-texnikaviy yangiliklarni joriy etish ishlariga munosib hissa qo‘shib kelmoqda.
Olim 2009-2024 yillar davomida “Jasmina”, “Farboma”, “Amira” kabi sifatli va qimmatli bug‘doy navlarini yaratdi va ushbu navlarga uchta patent oldi. Keyingi yillarda kuzgi yumshoq bug‘doyning “O‘zbekiston 30” va “Samarqand”, arpaning “Bek” navlarini yaratdi, ushbu navlar respublika Davlat nav sinash markazida sinalmoqda.
G‘ulom G‘aybullayev seleksiya va urug‘chilik hamda o‘simlikshunoslik ixtisosligi bo‘yicha 2017 yil qishloq xo‘jalik fanlari falsafa doktori, 2019 yil seleksiya va urug‘chilik ixtisosligida qishloq xo‘jaligi fanlari doktori ilmiy darajasiga ega bo‘ldi.
Tadqiqot natijalari asosida yaratilgan kuzgi yumshoq bug‘doyning “Jasmina”, “Farboma” hamda arpaning “Bek” navlari respublikamiz va viloyatda har yili 15 ming gektar maydonda keng ekilib kelinmoqda. Shuningdek, g‘allachilikka ixtisoslashgan fermer xo‘jaliklari, klasterlar bilan hamkorlik qilib, o‘z amaliy yordamlarini ko‘rsatib, bilim va amaliy malakasini oshirib kelmoqda.
G‘.G‘aybullayev 2 ta o‘quv uslubiy qo‘llanma, 2 ta o‘quv qo‘llanma, 1 ta darslik, 3 ta uslubiy tavsiyanoma va amaliy tavsiyalar muallifi.
Shuningdek, u oliy ta’lim tizimidagi ilmiy kengash a’zosi sifatida o‘quv fanlarining yangi standartlarini yaratish, namunaviy o‘quv rejalari va dasturlarini ishlab chiqishda faol ishtirok etmoqda.
Ilm-fan sohasi rivojiga qo‘shgan hissasi uchun G‘ulom G‘aybullayev Respublika Prezidentining Farmoniga ko‘ra “Shuhrat” medali bilan taqdirlandi.
Xurshida ERNAZAROVA.
