Дарахтларга бўлган муносабатимиз қачон ўзгаради?

Вилоят экология, атроф-муҳитни муҳофаза қилиш ва иқлим ўзгариши бошқармаси  раҳбар ва мутахассислари Самарқанд шаҳридаги «Ёшлик» истироҳат боғида мониторинг ўрганишлари ўтказди. 

Кузатишларда ҳудудда «Яшил макон» умуммиллий лойиҳасининг моҳияти тескари талқин қилинаётгани ойдинлашди. Мисол учун, болажонлар мириқиб дам оладиган масканда ўнлаб дарахтларнинг ости бетонлаб ташланган. Бу ҳолат охир-оқибат кўп йиллик дарахтларнинг қуриши ва сўлим гўшанинг қақраб қолишига сабаб бўлиши табиий.

Шунингдек, ҳудудда турли чиқиндилар, хусусан, хазон ва ўсимликлар қолдиқлари тўпланиб қолган. Ўрганиш давомида аттракционлар атрофини ободонлаштириш баҳонасида табиатга зарар етказган тадбиркорлар огоҳлантирилди. Тезкор тартибда дарахтлар атрофини бетон қопламаларидан тозалаб, белгиланган талаб даражасига келтириш, шу билан бирга ҳудудда санитар тозаликни сақлаш борасида топшириқлар берилди.