Қурилишда экологик талаблар: “TXT grup” объектида ҳолат қандай?

Вилоят экология ва иқлим ўзгариши бошқармаси ишчи гуруҳининг навбатдаги назорат тадбирлари Самарқанд шаҳридаги “TXT grup” компанияси томонидан қурилаётган “Соҳил” тураржой масканида ўтказилди.

-  Бу ерда 21 та блокда 850 та хонадон учун мўлжалланган кўп қаватли уйлар қурилмоқда, - дейди “TXT grup” компанияси иш юритувчиси Фарзод Эргашев. - Жами 7 гектардан иборат масканнинг 35 фоизи яшил ҳудудга мўлжалланган, ҳар бир уйнинг томига 70 кВт қуёш панеллари ўрнатиш, йўлакларни тўлиқ муқобил энергия асосида ёритиш белгиланган. Қурилиш жараёнида ҳавога чанг кўтарилишининг олдини олиш учун объектлар атрофига сув сепилмоқда, машиналар  чангдан тозаланиб, кейин кўчага чиқишга рухсат берилади.

Назорат тадбирлари давомида саноат корхоналарида тозалаш фильтрлари ўрнатиш, уларни вақтида алмаштириш, қурилиш иншоотларида чанг кўтарилишининг олдини олиш, доимий сув сепишни ташкил этиш бўйича кўрсатма ва тавсиялар берилди.