Энди Иштихонда ҳам малина етиштирилади
Туманнинг Бешариқ маҳалласи фермер хўжаликлари ҳудудидан ишсиз ёшлар учун ажратилган ер майдонининг 1 гектарига малина кўчатлари экилди.
- Бир неча йилдан бери мени ишсизлик муаммоси қийнаб келарди, - дейди маҳалла ёшларидан бири Сарвара Ҳуббимова. – Ўтган йили аукцион савдоси орқали ижарага ер берилаётгани ҳақида хабарни эшитдим ва унда қатнашиб, уйимизга яқин жойдан 30 сотих ер ютиб олдим. Бу йил эрта баҳорда маҳалламиздаги ҳоким ёрдамчиси ва банк ходимлари маслаҳатига кўра қўшниларим билан ижарага олган ер майдонимизда малина етиштирадиган бўлдик.
Туманда янгилик бўлган бу юмуш билан шуғулланиш осон эмас. Шунинг учун малиназор барпо этиш истагидаги ёшлар унинг сир-асрорларини кўп йиллик тажрибага эга жомбойлик деҳқонлардан ўрганишни бошлади.
Жомбой туманига бориб, малина етиштиришни ўрганиб келяпмиз, - дейди С.Ҳуббимова. – Кўчатларни ҳам улардан сотиб олишга қарор қилдик. Яхши ҳосил олиш учун ҳар бир қаторга бетон устунлар ҳам ўрнатиш керак экан. Бунинг учун эса 50 миллион сўм сарфлашимиз керак эди. Бунча пулни топишнинг ўзи бўлмайди. Шунда банк ходимлари бизга имтиёзли кредит олишимизга кўмаклашди. Шундай қилиб кўчатларни ўтқаздик. Бетон устунларни ўрнатдик. Малина йилига икки марта ҳосил берар экан. Яхши натижа кутиб турибмиз. Насиб этса, кредитни ҳам вақтида қайтариб, рўзғоримизга даромад келтирамиз.
Малиначилик билан шуғулланиш - сердаромад иш. Вилоятимизнинг Жомбой ва Тойлоқ туманлари деҳқонлари буни исботлаган. Иштихонликлар ҳам бу ишни эплай олишларига шубҳа йўқ.
Тўлқин СИДДИҚОВ,
Бахтиёр МУСТАНОВ.
