Андроид қурилмалар учун Zarnews.uz мобил иловаси. Юклаб олиш x

Кореяга кетган 7 нафар ўзбекистонликда коронавирус аниқлангани сабаб мигрантлар учун карантин қоидалари кучайтирилди

2021 йилнинг ноябрь ойидан бошлаб Корея Республикасига фуқароларни вақтинчалик меҳнат фаолиятини амалга ошириш учун ташкилий тарзда кириб бориши қайта йўлга қўйилган эди.

Ташқи меҳнат миграцияси агентлиги маълум қилишича, жорий йил 6 январь куни ташкилий тарзда 65 нафар биринчи маротаба шартномаси билан ҳамда 35 нафар қайта шартнома билан келган фуқаро вақтинчалик меҳнат фаолиятини амалга ошириш учун Корея Республикасига жўнатилган.

Фуқаролар Корея Республикаси томонидан тан олинган вакцина билан эмлангани ҳамда кетишдан 72 соат олдин олинган ПЦР тести натижасига кўра Covid-19 инфекцияси аниқланмаганига қарамасдан, Корея Республикасига кириб борган юртдошларимизда коронавирус инфекцияси қайд этилган.

Хусусан, 2021 йил 23-30 декабрь кунлари жўнаб кетган фуқароларнинг 1 нафарида, 2022 йилнинг 6 январь куни жўнаб кетган 98 нафар фуқаронинг 6 нафарида коронавирус инфекцияси аниқлангани сабабли Корея Республикаси томонидан Ўзбекистон учун ушбу давлатга кириб борувчи фуқаролар сони қисқариши, ҳаттоки вақтинчалик тўхтатилиши каби чекловлар қўйилиши мумкинлиги тўғрисида огоҳлантирилди.

Юқоридагиларни инобатга олиб, Ташқи меҳнат миграцияси агентлиги фуқароларимизнинг Корея Республикасига чекловларсиз кириб боришини таъминлаш мақсадида қуйидаги чораларни кўришга мажбур бўлмоқда:

- Корея Республикаси Инсон Ресурсларини ривожлантириш хизмати томонидан жўнаб кетиши тасдиқланган фуқаролар кетишдан олдин жами 3 марта ПЦР тестидан ўтишлари белгиланди;
- фуқарода Корея Республикасига боргач, Covid-19 инфекцияси аниқланса, барча харажатлар фуқаро томонидан амалга оширилади.