Моҳир журналист, шоир ва таржимон Зайниддин Баҳриддинов вафот этди

Иштихон туман жамоатчилиги, ижод аҳли оғир жудоликка учради. Шавқатсиз ўлим моҳир журналист, шоир, таржимон ва ажойиб инсон Зайниддин Баҳриддиновни орамиздан олиб кетди.

Зайниддин Баҳриддинов 1941 йилда Қўшработ туманининг Шавона қишлоғида туғилди. Меҳнат фаолиятини 1958 йилда Қийқим қишлоғидаги 91-мактабда ўқитувчиликдан бошлади. Кейинчалик Зарбанд қишлоғидаги 93 ва Чимқўрғон қишлоғидаги 14-мактабларда ёшларга сабоқ берди. 1965 йил 1 мартдан эътиборан ўз мақолалари билан фаол қатнашиб келган ўша давр газетаси – “Колхоз ҳаёти” таҳририятида адабий ходим сифатида иш бошлади. Бир йилдан сўнг бўлим мудири, орадан уч йил ўтар-ўтмас бош муҳаррир ўринбосари этиб тайинланди.

Зайниддин Баҳриддинов 1973 йилдан то 2012 йилга қадар халқ депутатлари Иштихон тумани Кенгаши ва туман ҳокимлигининг нашри бўлган “Иштихон овози” газетаси муҳаррири вазифасида фаолият олиб борди. Умрининг 47 йилини ана шу севимли газета ишига бағишлаган моҳир журналист 39 йил давомида таҳририятга раҳбарлик қилди.

Зайниддин Баҳриддинов нафақат устоз журналист, балки моҳир публицист, ҳассос шоир, ажойиб ёзувчи ва таржимон ҳам эди. У “Мезон”, “Тонгги қўшиқ”, “Митти гуллар ифори” шеърий тўпламлар, “Бунёдкорлар” очерклар тўплами, “Бобур ва Убайдуллахон”, “Қонли супра”, “Гулузор” номли қиссалар, “Узоқни кўзлаган қушлар”, “Миёнқол”, “Илдизлар ва япроқлар” номли китоблари, кўплаб эссе ва очерклар муаллифи сифатида кенг китобхонлар оммасига танилган. Қатор чет эл мумтоз адабиёти вакилларининг асарларини етук олим Маҳкам Маҳмудов билан ҳамкорликда ўзбек тилига таржима қилди. Абу Ҳасан Ҳужвирийнинг “Кашфал маҳжуб-фи арбоб-ул қулуб”, Фариддидин Атторнинг “Булбулнома” (насрий баёни), Абу Али ибн Синонинг “Ишқ”, “Маод” рисолалари, Теофрастнинг “Одамзод феъллари” асарлари шулар жумласидандир.

Серқирра ижодкор қатор орден ва медаллар, “Шарқ юлдузи” журналининг “Сурхон” мукофоти соҳиби эди.

Ажойиб инсон, моҳир журналист Зайниддин Баҳриддиновнинг ёрқин хотираси туман жамоатчилиги, шогирдлари ва дўстлари қалбида абадий яшайди.

Иштихон тумани ҳокимлиги ҳамда “Иштихон овози” газетаси ижодий жамоаси.

"Зарафшон" ва «Самаркандский вестник» газеталари бирлашган таҳририяти жамоаси марҳумнинг яқинларига чуқур таъзия изҳор этади.