“Prava”ni almashtirmasa nima bo‘ladi, yangisi qanday olinadi?

Viloyat IIB YHXB mutasaddilarining aytishicha, haydovchilik guvohnomasini almashtirish muddati o‘tib ketgani jarimaga tortish uchun asos bo‘lmaydi.

Faqat belgilangan muddatda almashtirilmagan haydovchilik guvohnomasi bilan transport vositasini boshqarsa va bu holat YPX xodimlari tomonidan hujjatlarni tekshirish davomida aniqlansa, ma’muriy chora ko‘riladi.

Haydovchilik guvohnomasi belgilangan muddatdan 12 oy o‘tgandan keyin yangilanadigan bo‘lsa, nazariy va amaliy imtihon topshirish talab etiladi.

Qayd etilishicha, shu paytgacha haydovchilik guvohnomasi olish uchun imtihonlar hududiylik asosida Oqdaryo, Kattaqo‘rg‘on va Samarqand tumani hamda Samarqand shahrida o‘tkazilgan.

Endi bu jarayon faqat bitta joyda – viloyat YHXBda tashkil etiladi. Bunda maxsus jihozlangan xonada test sinovlari o‘tkaziladi. Talabgorlar, ya’ni avtomaktab kurslari bitiruvchilari 20 ta test savollariga javob berishlari kerak. Ko‘rsatilgan savollarning 18 tasiga to‘g‘ri javob bergan nomzod test sinovlaridan o‘tgan hisoblanadi.

Ma’lumotlarga ko‘ra, bir kunda o‘rta hisobda 70 kishi 54 ming so‘m to‘lovni amalga oshirib, sinovlarda ishtirok etyapti. Ularning 80 foizi birinchi urinishda sinovdan o‘ta olmayotgan ekan.

Tartibga ko‘ra, test sinovlarini qoniqarsiz topshirganlar bir hafta avtomaktabda qayta o‘qib, 41 ming so‘m to‘lov qilsa takroriy test topshirishi mumkin. Agar natijalar yana muvaffaqiyatsiz amalga oshsa, to‘lov va jarayon qayta takrorlanadi.

Test sinovlaridan muvaffaqiyatli o‘tganlar uchun avtohavaskorlar maktabining Samarqand shahar Xishrav qo‘rg‘onida joylashgan 2,1 gektarlik o‘quv poligonida amaliy imtihonlar o‘tkaziladi. Bunda nomzodlar qoida bo‘yicha 9 ta mashqni bajaradi. Agar ularning 3 ta yoki undan ko‘pida xatoga yo‘l qo‘ysa, imtihondan o‘tmagan hisoblanadi.

Qayd etilishicha, test sinovlari va amaliy imtihonlar jarayoni to‘liq videokameralar orqali onlayn kuzatib boriladi. Tarmoqqa istalgan kishi ulanib, jarayonni bevosita nazorat qilishi mumkin.