Профилактика инспекторидан 200 доллар талаб қилган сохта ДХХ ходими ушланди
Қарши шаҳрида сохта ДХХ ходими - фуқаро Фурқат Очилов Нишон тумани ички ишлар бўлими профилактика инспекторидан 200 АҚШ долларини олаётган вақтида ушланди. Бу ҳақда ЎзА хабар бермоқда.
Аниқланишича, Ф.Очилов профилактика инспекторига қўнғироқ қилиб, ўзини ДХХ ходими, дея таништиради ва унга нисбатан Нишон туманидаги деҳқон бозори ҳамда туман ҳокимлиги олдидаги 2 та ҳолат бўйича видеоёзув борлигини айтиб, алдайди. Агарда 200 АҚШ доллари берса, гўёки, профилактика инспекторининг ноқонуний хатти-ҳаракатлари тасвирланган ушбу видеоёзувлар билан боғлиқ муаммони ҳал қилиб беришини билдиради.
Тезкор тадбирда Китоб туманида туғилган Ф.Очиловнинг ёнидан ДХХ Чегара қўшинларининг сохта гувоҳномаси ва бир нечта фуқароларнинг паспорт нусхалари ҳамда фотосуратлари топилди. Шунингдек, у вақтинчалик яшаб келган Нишон тумани Улуғбек МФЙдаги уйдан лейтенант унвонидаги ДХХнинг ҳарбий кийими ашёвий далил сифатида олинди.
Мазкур фуқаро муқаддам фирибгарликда айбланган ва унга нисбатан жиноят иши қўзғатилиб, қидирув эълон қилинган.
